«Բարգավաճ Հայաստան» կուսակցության պատգամավոր Նաիրա Զոհրաբյանը կողմ է հայաստանյան քաղաքական ուժերի երիտասարդացման գաղափարին և գտնում է, որ առողջ սերնդափոխության բացակայությունը նրանց առաջնային խնդիրներից է: Այս մասին նա ասաց «Առաջին լրատվական»-ի հետ զրույցում:
«Տեղյակ չեմ՝ հայաստանյան քաղաքական մշակույթում երբևէ նման բան եղե՞լ է, թե ոչ (հավանաբար՝ ոչ), սակայն «Բարգավաճ Հայաստան» կուսակցությունն առաջինն էր, որ ստեղծեց երիտասարդ կուսակցական կադրերի, ապագա քաղաքական գործիչների դպրոց: Մեր երիտասարդական կառույցին կից նման ուսումնական կենտրոն է գործում:
Պետք է ընդունենք, որ գործող կուսակցությունների խնդիրն առողջ սերնդափոխություն իրականացնելն է: Գաղտնիք չէ, որ խորհրդարանում, հասարակական և քաղաքական կյանքում տեսնում ենք մարդկանց, ովքեր տասնամյակներով պաշտոնավարում են և չեն փոխվում: Բայց իրապես կարևոր է, որ այն երիտասարդները, որոնք համլրելու են պետական-քաղաքական պաշտոնյաների շարքերը, պրոֆեսիոնալներ լինեն: Իսկ պրոֆեսիոնալիզմի հասնելու համար երիտասարդներն անպայման պետք է դպրոց անցնեն: Այդ առումով, ԲՀԿ-ն առաջիկա խորհրդարանական ընտրությունների ժամանակ իր համամասնական ցուցակում անպայմանորեն երիտասարդների է ներգրավելու:
Մեր համամասնական ցուցակում անփոխարինելի մարդիկ չկան, և որևէ մեկը իր պատգամավորական տեղի վրա սեփականության վկայական չունի: Իհարկե, երիտասարդ կադրերի ընտրությունը կատարվելու է այն չափորոշիչով՝ ով է ավելի ունակ տվյալ գործը կատարելու: Երիտասարդ կադրերին ներկայացնելու ենք նաև կառավարման տարբեր օղակներում, և այդ մարդիկ պատահական մարդիկ չեն լինելու: Նրանց բանաձևը չի լինելու «հանուն պաշտոնի»: Նրանք լինելու են տվյալ ոլորտի արհեստավարժ ներկայացուցիչներ»,- հավաստիացրեց պատգամավորը:
Զոհրաբյանի խոսքով, պետական կառավարման մասին խոսելիս անընդհատ վերամբարձ բառեր ենք ասում, մինչդեռ պետական կառավարման մենեջմենթը շատ պարզ բանաձև ունի՝ ճիշտ կադրը ճիշտ տեղում:
