Ավելի քան մեկ ամիս առաջ հրաժարական տված Իտալիայի վարչապետ Սիլվիո Բեռլուսկոնին հայտարարել է, որ կդադարի քաղաքականությամբ զբաղվել միայն այն ժամանակ, երբ իր երկիրն իսկապես լիբերալ դառնա:
«Ես հրաժարական տվեցի, քանի որ զգում էի, որ ծանր վիճակում գտնվող Իտալիային անհրաժեշտ է քաղաքական ուժերի առավելագույն միասնություն: Դա պահանջում էր որոշ զոհեր, և ես որոշեցի դա անել՝ այդ փուլը հաղթահարելու համար»,- ասել է Բեռլուսկոնին Chi շաբաթաթերթին տված հարցազրույցում:
Նա նշել է, որ քաղաքական թատերաբեմում իր պարտականություններն ավարտված չի համարում, սակայն ապագայում չի պատրաստվում վերընտրվել վարչապետի պաշտոնում, քանի որ անհրաժեշտ է «սերնդափոխություն»:
Խոսելով ներկա վարչապետ Մարիո Մոնտիի մասին՝ 75-ամյա Բեռլուսկոնին նրան անվանել է «սթափ մտքով մարդ»:
Սիլվիո Բեռլուսկոնին Իտալիայի վարչապետի պաշտոնը զբաղեցնում էր վերջին 3.5 տարիների ընթացքում և հրաժարական տվեց նոյեմբերի 12-ին երկրում շարունակվող քաղաքական ճգնաժամի ֆոնին:
