Forbes ամսագիրը հրապարակել է աշխարհի ամենահարուստ մարդկանց կողմից իրականացված ամենաթանկ գնումները: Այդ ցուցակը գլխավորում է ռուս օլիգարխ Ռոման Աբրամովիչը: Նա գնել է Սանկտ Պետերբուրգից ոչ հեռու գտնվող Նոր Հոլանդիա կղզին, որտեղ նախատեսում է կառուցել օֆիսային տարածքներ, հյուրանոցներ, գեղարվեստի սրահներ, ռեստորաններ և առևտրի կենտրոններ: Կղզում 18-րդ դարից պահպանվում են պահեստներ, որոնք էլ Աբրամովիչը պատրաստվում է վերականգնել: Այս տարածքն Աբրամովիը գնել է 400 մլն դոլարով:
Երկրորդ տեղն այս ցուցակում զբաղեցնում է հեջային հիմնադրամի ղեկավար Սթիվեն Քոհենը, որը արվեստի գործեր գնելու համար ծախսել է 145.4 մլն դոլար: Նա գնել է Ջասպեր Ջոնսոնի հայտնի «Դրոշ» կտավը, ինչպես նաև Էնդու Ուորհոլի «Coca-Cola շիշ» կտավը, որը 2010 թ. աճուրդի ժամանակ վաճառված ամենաթանկ արվեստի գործերից էր:
Երրորդը պակիստանցի միլիարդատեր Միան Մուհամադ Մանշան է, որը Լոնդոնի St. James հյուրանոցի և ակումբի համար վճարել է 95 մլն դոլար: