«Ընտրության գումարային արտահայտությունը քաղաքացին ինքն է որոշում: Եթե քաղաքացին իր ընտրական իրավունքը վաճառում է 5 հազար դրամով, այդ քաղաքացուց ակնկալիքը քիչ է, և այդ քաղաքացին պետության համար էլ է վտանգավոր: Ընտրության իրավունքը չի վաճառվում»,- այսօր ասուլիսի ժամանակ հայտարարեց ԱԺ սոցիալական հարցերի հանձնաժողովի նախագահ ՀՀԿ-ական Հակոբ Հակոբյանը:
Նրա խոսքով, եթե 5 հազար դրամ են վերցնում, հետո ի՞նչ են ուզելու այդ «ընտրված» քաղաքական ուժից, իսկ 4-5 տարին մեկ 5 հազար դրամը ոչ մեկին չի փրկելու: Հ. Հակոբյանը նաև նկատեց, որ ԶԼՄ-ները պետք է հասարակության շրջանում ձևավորեն ընտրակաշառք չվերցնելու մշակույթը:
«Նոր ժամանակներ» կուսակցության նախագահ Արամ Կարապետյանը հայտարարեց, որ ընտրակաշառք և՛ տալը, և՛ վերցնելը քրեորեն պատժելի են:
«Յուրաքանչյուրը, լինի ընդդիմությունից, լինի իշխանությունից, պետք է ժողովրդին ասի, որ դա քրեորեն պատժելի է: Դա բերում է նրան, որ երկրում ընտրությունները դառնում են անիմաստ, իսկ այդ դեպքում լինում են «արաբական գարուններ»: Ստացվում է, եթե ընտրությունները վաճառվում են. մի օլիգարխ կարող է գալ առնել, հետո հարստանալ ու էլի առնել: Դա չեղավ քաղաքականություն»,- ասաց Ա. Կարապետյանը: