Անցյալ շաբաթ Բրյուսելում Ռուսաստան-ԵՄ գագաթնաժողովի շրջանակներում սպասվող՝ ՌԴ նախագահ Դմիտրի Մեդվեդևի և ՆԱՏՕ-ի գլխավոր քարտուղար Անդերս ֆոգ Ռասմուսսենի հանդիպումը չի կայացել: Հանդիպմանը նրանք պատրաստվում էին քննարկել ԵվրոՀՀՊ-ի կառուցման շուրջ բանակցություններում առաջացած փակուղուց դուրս գալու ուղիները: Коммерсантъ թերթի փոխանցմամբ՝ խնդրի քննարկումը տեղի չի ունեցել, քանի որ կողմերը չեն կարողացել համաձայնության գալ հանդիպման անցկացման վայրի հարցում: Չի բացառվում, որ այժմ ԵվրոՀՀՊ-ի շուրջը փոխհամաձայնուլթյան ուղիներ պետք է փնտրի վարչապետ Վլադիմիր Պուտինը:
ՌԴ ԱԳՆ աղբյուրը պարբերականին հայտնել է, որ ՌԴ նախագահի ներկայացուցիչները Ռասմուսսենի շրջապատին առաջարկել են հանդիպումն անցկացնել գագաթնաժողովի վերջին օրը՝ այն հյուրանոցում, որտեղ մնում է Մեդվեդևը: Սկզբնապես այս առաջարկին Ռասմուսսենի գրասենյակում համաձայնություն են տվել, սակայն ավելի ուշ հայտնել են, որ դաշինքի ղեկավարը հեծանիվով շրջելիս վայր է ընկել ու կոտրել ձեռքը և այժմ դժվարանում է շարժվել:
Ի պատասխան՝ ռուսական կողմն առաջարկել է հանդիպումն անցկացնել չեզոք տարածքում, օրինակ՝ ռեստորանում, սակայն Ռասմուսսենը հրաժարվել է:
