Ավիավթարի զոհ դարձած Լեհաստանի նախկին նախագահ Լեխ Կաչինսկու եղբայր Յարոսլավ Կաչինսկին կասկածներ է հայտնել այն մասին, որ ռուսական կողմը Վարշավային փոխանցել է Լեհաստանի ղեկավարի կեղծ աճյունը,- հայտնել է Rbk.ru-ն:
Ինչպես նշել է Յարոսլավ Կաչինսկին, ընտանիքին հայտնել են, որ դա Լեխ Կաչինսկու աճյունն է: Սակայն Կաչինսկու խոսքով, ո՛չ ինքը, ո՛չ զոհված Կաչինսկու դուստրը արտաշիրիմում իրականացնելու որոշում դեռ չեն կայացրել: Նա հայտնել է, որ երբ առաջին անգամ Սմոլենսկում տեսել է եղբոր դին, կարողացել է ճանաչել, քանի որ եղբոր ուսին տեսել է հայտնի սպին,- հաղորդել է Deutsche Welle-ն: Սակայն հետո՝ արդեն հուղարկավորության ժամանակ, Կաչինսկին չի ճանաչել եղբորը, քանի որ դա եղել է մի մարդու դի, որն ընդհանրապես նման չի եղել իր եղբորը,- հայտնել է Reuters-ը: Ինչպես տեղեկացրել է Յարոսլավ Կաչինսկին` Սմոլենսկում եղբոր ճանաչման ժամանակ Լեխ Կաչինսկու աճյունի կողքին մարմնի մասեր էին, որոնք չէին պատկանում եղբորը, քանի որ նա չի կրել գեներալի հագուստ: Յարոսլավ Կաչինսկին ասել է, թե Լեհաստանի օրենքներն այնպիսին են, որ ինքը այն ժամանակ չէր կարող այդ մասին խոսել:
