Associated Press գործակալությունը, հղում կատարելով ԱՄՆ տրանսպորտի նախարարության իր անանուն աղբյուրին, հայտնում է, որ ճապոնական Toyota Motor Corp. ընկերությունը ԱՄՆ կառավարությանը կվճարի ևս 32.4 մլն դոլար, քանի որ ամերիկյան իշխանություններին ժամանակին չի հայտնել իրենց մեքենաներում գազի սեղմակի անսարքության մասին: Այսպիսով, ընդհանուր տուգանքը, որն ընկերությունը վճարում է ԱՄՆ իշխանություններին կկազմի 50 միլիոն դոլար:
Հիշեցնենք, որ 2010 մայիսի Toyota Motor Corp.-ը ամերիկյան կառավարությանը արդեն վճարել է 16.4 մլն դոլար: Չնայած Toyota ընկերությունը համաձայնել է վճարել ամբողջ տուգանքը չափով և չի բողոքարկել այն դատարանում, այնուամենայնիվ, ընկերության ներկայացուցիչները հայտնել են, որ Toyota-ն որևէ օրենք չի խախտել և համաձայնել է վճարել տուգանքը, քանի որ չի ցանկացել մտնել երկար դատական գործընթացների մեջ:
2010 մարտին ԱՄՆ տրանսպորտի նախարարությունը Toyota-ի ղեկավարությունից պահանջել էր այն բոլոր թղթերը, որոնք վերաբերում են մեքենաների զանգվածային հետկանչմանը, որպեսզի պարզի՝ արդյոք ընկերությունը օպերատիվ կերպո՞վ է մեքենաների տերերին տեղյակ պահել այդ խնդրի մասին: Տրանսպորտի նախարարությունում կարծում են, որ ընկերությունն արդեն 2009 թ. սեպտեմբերին իմացել է այդ խնդրի մասին, սակայն ավելի քան 4 ամիս ձգձգել է տեղեկատվության փոխանցումը իշխանություններին:
Վերոնշյալ դեֆեկտն ունեցող մեքենաների ընդհանուր քանակը, որոնք Toyota Motor ընկերությունը հետ է կանչել ամերիկյան և եվրոպական շուկաներից, 8.5 մլն մեքենա է: Մի քանի օր առաջ էլ Toyota-ն հետ է կանչել 1998-2010 թթ. արտադրված Sienna մակնիշի մեքենաները, քանի որ դրանք պահեստային անվադողի ամրացման խնդիրներ ունեն: Ընկերությունը նաև դադարեցրել է GX460 արտաճանապարհային մեքենաների վաճառքն ամբողջ աշխարհում այն նպատակով, որպեսզի իրականացնի այդ մեքենայի շրջապտույտի ժամանակ մեքենայի կայունության փորձարկումը: