Առաջիկա տարիների համար նոր ռազմավարական ծրագիր ընդունելու նպատակով երիտասարդության ազգային նոր զեկույց է պատրաստվում, որը պատրաստ կլինի փետրվարին: Այսօր կայացած մամուլի ասուլիսին այս մասին հայտարարեց սպորտի և երիտասարդության հարցերի փոխնախարար Արսեն Քարամյանը:
Ինչպես ներկայացրեց Ա. Քարամյանը` ազգային զեկույցը կազմելու նպատակով անցկացված հարցմանը մասնակցել է տարբեր տարիքի, սեռի և դեմոգրաֆիական խմբի 1200 մարդ:
«Երիտասարդների 54,6 տոկոսը տանը համակարգիչ ունի, դրանց ավելի քան 40 տոկոսը միացված է համացանցին. սա շատ լավ ցուցանիշ է: Երիտասարդների 96 տոկոսն ունի բջջային հեռախոս` մեծ մասը ինտերնետի մուտքով: Սա նշանակում է, որ ինտերնետ-հասանելիությունը այլևս խնդիր չէ, որը ևս ուրախացնող և շատ կարևոր հանգամանք է:
Երիտասարդության շրջանում ռուսերենի իմացությունը հայերենի համեմատ աննշան է հետ մնում: 37 տոկոսը ընդհանրապես չի տիրապետում անգլերենին, 17,6 տոկոսը տիրապետում է գերազանց կերպով: Դպրոցում աշակերտներին շատ ավելի հետաքրքրում են հայոց պատմության և հայ գրականության դասաժամերը: 22,8 տոկոսը դպրոցում գեղարվեստական գրականություն չի կարդում:
Երիտասարդների ավելի քան 60 տոկոսը ցանկանում է սովորել արտասահմանում: 76,3 տոկոսը ընտանիք է կազմում է մինչև 30 տարեկանը: Ըստ նրանց` չամուսնանալու պատճառներն են` ազատ ապրելու ցանկությունը, ընտրյալ չունենալու հանգամանքը և վերջում միայն` աշխատանքի բացակայությունը, ֆինանսական մեծ ու փոքր խնդիրները»,- նկատեց Արսեն Քարամյանը:
Ըստ հարցումների արդյունքների` իգական սեռի ներկայացուցիչների համար ծխելն առավել անընդունելի է` այն դեպքում, երբ հիշյալ խմբի ներկայացուցիչները ավելի հեշտ ընդունում են առանց երեխա ամուսին ունենալու հանգամանքը:
«Երիտասարդներից աշխատանք ունի 48,7 տոկոսը` առավել մեծ թիվ են կազմում աղջիկերը: Երկու չափահաս և երկու անչափահաս անդամներից բաղկացած ընտանիքի` Երևան քաղաքում լավ ապրելու համար հարցվածներն ակնկալում են ունենալ ամսական շուրջ 515 հազար դրամ եկամուտ, այն դեպքում, երբ գյուղում այդ գումարը 191 հազար է:
Ինչ վերաբերում է քաղաքական գործընթացներին, ապա քաղաքական պասիվ վարքագիծ է հանդես բերում հայ երիտասարդների ավելի քան 30 տոկոսը: Զարմանալիորեն, երիտասարդությունը ամենից շատ վստահում է Հայ առաքելական եկեղեցուն և հայոց բանակին, թեև բանակում կատարվող անցանկալի միջադեպերին»,- ասաց փոխնախարարը:
Ամփոփելով` Արսեն Քարամյանը նկատեց, որ վերոնշյալ զեկույցի` կառավարությունում քննարկումները կօգնեն սահմանել երիտասարդության` առաջիկա տարիների խնդիրները և դրանց լուծումներ տալ: