Հայաստանում կանանց մոտ 0,8%-ը վերջին հինգ տարիներին կատարել է հղիության արհեստական ընդհատում` պայմանավորված ապագա երեխայի սեռով: Ներկայացնելով ՄԱԿ-ի Բնակչության հիմնադրամի «Սեռով պայմանավորված հղիության արհեստական ընդհատումների տարածվածությունն ու պատճառները Հայաստանում» զեկույցը` նման տեսակետ հայտնեց վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի տնօրեն, ՀՀ ԱՆ գլխավոր մանկաբարձ-գինեկոլոգ, պրոֆեսոր Ռազմիկ Աբրահամյանը:
Զեկույցը պատրաստվել է ՀՀ առողջապահության նախարարության, Վերարտադրողական առողջության, պերինատոլոգիայի, մանկաբարձության և գինեկոլոգիայի հանրապետական ինստիտուտի և ՄԱԿ-ի Բնակչության հիմնադրամի համագործակցությամբ իրականացվող «Սեռական և վերարտադրողական առողջության ծառայությունների հզորացում» ծրագրի շրջանակներում`ՀՀ ազգային վիճակագրական ծառայության աջակցությամբ:
ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանը տեղեկացրեց, որ զեկույցը մի քանի տարիների աշխատանքի արդյունք է: «Նկատեցինք, որ տղաների ծնունդը աղջիկների համեմատ շատ ավելի մեծ թիվ է կազմում, այդ պատճառով խնդրին սկսեցինք մեծ ուշադրություն հատկացնել: Այս հանգամանքը հետագայում մեծ ազդեցություն կունենա ժողովրդագրական տվյալների վրա և հղի է բացասական հետևանքներով, ի վերջո` խախտվում է մարդու ապրելու իրավունքը»,- հավելեց Գ. Հայրապետյանը:
Անդրադառնալով զեկույցում ներկայացված ցուցանիշներին` Ռազմիկ Աբրահամյանը նշեց, որ սեռով պայմանավորված հղիության ընդհատման խնդիրը ուսումնասիրվում է շատ երկրներում: Ըստ նրա` վերջին տարիներին և մայրերի, և երեխաների մահացության դեպքերը պակասել են:
«Ամեն 100 000-ից ընդամենը երեք մայրական մահացության դեպք է գրանցվել: Զեկույցի շրջանակում հղիության արհեստական ընդհատման վերաբերյալ անցկացվել են հարցումներ: Ըստ այդ հարցումների` սեռի որոշման համար դիմել է 420 կին, շուրջ 95%-ը շարունակել է հղիությունը»,- մանրամասնեց գլխավոր մանկաբարձ-գինեկոլոգը` հավելելով, որ միայն 5,5 %-ն է դիմել արհեստական ընդհատման:
Նա նաև տեղեկացրեց, որ 1000-ից 8 կին է սեռի պատճառով ընդհատել հղիությունը: Հիվանդանոցներում նույնպես կատարվել են հարցումներ, ըստ որոնց` 368 կանանցից 4,6%-ն է սեռի պատճառով հրաժարվել հղիությունից: Ռ. Աբրահամյանի խոսքով` գյուղերում տղա երեխա ունենալու ցանկությունն ավելի մեծ է, քան քաղաքներում:
«Տղաների քանակը թեև ավելին է, բայց բնությունն ի վերջո դա կարգավորում է: Մի շարք պատճառներով տարիների ընթացքում տղաների և աղջիկների քանակը հավասարվում է»,- ամփոփեց Աբրահամյանը: