Հիմք ընդունելով ՀՀ Սահմանադրության 49-րդ հոդվածով սահմանված
դրույթները՝ այսօր դիմել ենք ՀՀ նախագահին, տեղեկացնելով այն մասին, որ երեկ
վարչապետը հպարտորեն օծվեց մանկավարժական համալսարանի խորհրդի նախագահի
պաշտոնում: Այսինքն՝ խախտելով սահմանադրական կարգը (88-րդ հոդված), պարոն
Տ. Սարգսյանը իր պարտականությունների հետ չկապված պաշտոն է զբաղեցնելու
պետական մարմնում, այն է` «…պետական մանկավարժական համալսարան» պետական
ոչ առևտրային կազմակերպության կառավարման մարմնում:
Ի դեպ, համաձայն «բուհի խորհրդի ձևավորման կարգի»՝ հիմնադրի անունից, օր ու գիշեր մեզ քաղաքակրթություն դասավանդող վարչապետն ինքն է իրեն առաջարկել և հաստատել այդ խորհրդի կազմում:
Հարկ ենք համարում հիշեցնել նաև, որ նույն հակասահմանադրական կարգավիճակում են գտնվում նաև ԵՊՀ և ՊՏՀ խորհրդի նախագահների պաշտոնները զբաղեցնող պարոններ Սերժ Սարգսյանը և Հովիկ Աբրահամյանը: Ավելին,
վերջիններիս դեպքում զավեշտալին նաև այն է, որ հանդիսանում են վարչապետի
ներկայացուցիչներն այդ մարմիններում:
Այս պայմաններում, դժվար է անգամ պատկերացնել, թե ինչ տեղի կունենա, եթե
հարկ լինի իրականացնել հիշյալ կարգի 13-րդ կետի պահանջները, այն է`
«Խորհրդի անգործության դեպքում հիմնադիրը կարող է վաղաժամկետ դադարեցնել խորհրդի
նախագահի լիազորությունները կամ լուծարել խորհուրդը»:
Ինչևէ, ՀՀ նախագահին հասցեագրված դիմումում հույս ենք հայտնել, որ նա վերջապես միջոցներ կձեռնարկի՝ վերջ դնելու ՀՀ Սահմանադրության հանդեպ դրսևորվող այս արհամարհանքին և վերականգնելու ՀՀ սահմանադրական կարգը (65-րդ,
88-րդ, 98-րդ հոդվածներ), որը համատարած ձևով խախտվում է իշխանության
բոլոր թևերի ներկայացուցիչների, այդ թվում՝ ձեռներեց-պաշտոնյաների և, հատկապես,
ՀՀԿ-ականների կողմից:
