ԼՂՀ Վերահսկիչ պալատը այս տարի ստուգումներ է անցկացրել մի շարք պետական ոչ առևտրային կազմակերպություններում, որոնց արդյունքում հետաքրքիր խախտումներ են արձանագրվել: Մասնավորապես,Վերահսկիչը խախտումներ է արձանագրել Ղարաբաղի ամենաիշխանամետ և իշխանությունների կողմից ամենաշատ պատվերներն ու սուբսիդիաները ստացող երգչախմբում` «Մռակած»-ում: Ըստ ԼՂՀ Վերահսկիչ պալատի հրապարակած արդյունքների՝ խախտումները բազմաբնույթ են։ Մասնավորապես՝ ԼՂՀ մշակույթի և երիտասարդության հարցերի նախարարության և «Մռակած» կամերային երգչախմբի միջև 2009 թվականի համար կնքվել է պետական աջակցության հատկացման պայմանագիր: 2008 թվականին տրամադրվել է սուբսիդիա, սակայն բացակայում է սուբսիդիայի տրամադրման պայմանագիրը: Վերահսկիչը պարզել է, որ 2008-ին ամենամյա արձակուրդային վճարների և անաշխատունակության նպաստների վճարումները կատարվել են ԼՂՀ աշխատանքային օրենսգրքի պահանջների խախտմամբ: Պարզվել է, որ հյուրախաղերի անցկացման ընթացքում կազմակերպության աշխատակից չհամարվող 3 ֆիզիկական անձանց, առանց իրավական հիմքի` պայմանագրային հարաբերությունների, վճարվել է օրապահիկի և խրախուսման գումար: Պարզվել է, որ 2008-ին պետական մարմիններին ներկայացված հաշվետվությունները, ինչպես նաև կրեդիտորական և դեբիտորական պարտքերը արժանահավատ չեն: Վերահսկիչի ներկայացրած տվյալներով, 2008-2009 թվականներին հաստատված հաստիքացուցակներով երգչախմբում նախատեսվել են բարձր կարգի և առաջին կարգի երգիչների հաստիքներ` համապատասխան վարձատրությամբ: Չնայած հաստիքացուցակով նախատեսվել է երգիչների երկու տեսակի կարգ` կնքված աշխատանքային պայմանագրերում որպես պաշտոն նշվել է պարզապես երգիչ (երգչուհի), առանց որևէ կարգի` խախտելով ԼՂՀ աշխատանքային օրենսգիրքը: Երգիչների բարձր և առաջին կարգերը որոշվել են տնօրենի հրամաններով: Վերահսկողությամբ ընդգրկվող ժամանակաշրջանում տնօրենի հրամանների հիման վրա բարձր կարգի երգիչները դարձել են առաջին կարգի երգիչներ և հակառակը` առանց վերջիններիս նախնական գրավոր համաձայնության։