Հայաստանի գլխավոր դատախազ Աղվան Հովսեփյանը չի պատրաստվում հրաժարական ներկայացնել: Այս մասին նա ասել է այսօր` դեկտեմբերի 17-ին, «Նիգ-Ապարան» հայրենակցական միության 5-րդ համագումարից հետո, լրագրողների հետ զրույցում: Նշենք, որ Աղվան Հովսեփյանը «Նիգ-Ապարանի» պատվավոր նախագահն է:
«Ես արդեն զզվել եմ այդ հիմարություններին պատասխանելուց, հրաժարական չեմ պատրաստվում ներկայացնել և պատրաստվում եմ ակտիվորեն աշխատել` հանուն մեր պետականության, հանուն մեր իրավական համակարգի աշխատանքների արդյունավետության բարձրացման: Այդ հիմարությունները ստեղծված են տարբեր չարամիտ նպատակներով: Բոլորդ գիտեք դա, չնայած դրան, միշտ անում եք նման հարցադրումներ: Այդ լուրերը ընդամենը տարածում են մարդիկ, ովքեր դժգոհ են կամ գոհ չեն դատախազության համակարգից, ես ուղղակի ցավով եմ դա նշում և խղճում եմ այդ մարդկանց»,- ասել է գլխավոր դատախազը:
Այնուհետև անդրադառնալով Սյունիքի մարզպետ Սուրիկ Խաչատրյանի կողմից գործարար Սիլվա Համբարձումյանին հարվածելու փաստի առթիվ հարուցված քրգործը կարճելու փաստին` գլխավոր դատախազը նշել է. «Հարուցվեց քրեական գործ օրենքով սահմանված կարգով, կատարվեց օբյեկտիվ և բազմակողմանի նախաքննություն, որի ընթացքում լիարժեք կերպով պարզաբանվեց, թե ինչ է տեղի ունեցել: Պարզաբանելու խնդիր այլևս չկա, քանի որ ամբողջ միջադեպը նկարահանված էր, իսկ դա որևէ քրեական օրենսգրքով նախատեսված որևէ հանցագործության հանցակազմ առաջ չի բերում: Բավարարված կլինեն, թե ոչ` մենք գործել ենք օրենքով և քրեաիրավական գնահատականը տվել ենք օրենքով նախատեսված կարգով»:
Հիշեցնենք, որ այդ փաստի առթիվ ՀՔԾ-ում քրեական գործ էր հարուցվել «ծեծ» հոդվածի հատկանիշներով: Գործը կարճվել էր, քանի որ ՀՔԾ-ն հայտարարել էր, որ ծեծի հատկանիշներ չկան. Սուրիկ Խաչատրյանը ընդամենը մեկ անգամ ապտակել է Սիլվա Համբարձումյանին: Վերջինս իր հերթին գոհունակություն էր հայտնել ՀՔԾ որոշումից, քանի որ, ըստ նրա, Սուրիկ Խաչատրյանը զղջում է իր արածի համար:
