Այսօր «Արմատ» մամուլի ակումբի հյուրն էր Հայաստանի Արմֆայթինգ ֆեդերացիայի նախագահ Հայկ Ղուկասյանը: Ասուլիսին մասնակցում էին նաև միջազգային մրցաշարի հաղթողներ Անդրանիկ Կարապետյանը, Հրանտ Ասատրյանը, Վարշամ Գևորգյանը և Տարոն Մկրտչյանը:
Նշենք, որ Վրաստանում դեկտեմբերի 11-ին կայացած մրցումներին Հայաստանի հավաքականը գերազանց ելույթ ունեցավ` մեկը մյուսի ետևից ծնկի բերելով Ադրբեջանի հավաքականի մարզիկներին, և ոչ միայն նրանց:
«Նախևառաջ ցանկանում եմ շնորհակալություն հայտնել բոլոր ներկաներին: Հավաքականը նոր է վերադարձել Վրաստանից, որտեղ դեկտեմբերի 11-ին մասնակցեց Հայաստանի, Վրաստանի և Ադրբեջանի հավաքականների միջև կայացած միջազգային մրցումներին: Այն կարող ենք համարել նաև Կովկասի առաջնություն:
Մենք ներկայացանք 5 հոգանոց կազմով` տարբեր քաշային կարգերում: Բոլոր մենամարտերի 1-ին ռաունդում տարանք հաղթանակներ` բացառությամբ մեկի, որը մեր օգտին ավարտվեց 2-րդ ռաունդում»,- նշեց ֆեդերացիայի նախագահը:
Հայկ Ղուկասյանը խոսեց նաև 2011 թվականին Արմֆայթինգի կատարած աշխատանքների և ադրբեջանցի մարզիկների դեմ կայացած մենամարտերի առանձնահատկության մասին:
«Արմֆայթինգի` 2011 թվականին կատարած աշխատանքը գնահատում եմ գերազանց: Մենք արդեն մասնակցել ենք 26 մրցաշարի, իսկ դեկտեմբերի 20-ին կմասնակցենք Մախաչկալայում կայանալիք Աշխարհի թիմային առաջնությանը, որտեղ Հայաստանը կներկայացնեն 2 մարզիկներ՝ Հրանտ Ասատրյանը և 27-ամյա Էդիկ Աբելյանը. Հրանտ Ասատրյանը ելույթ կունենա Մ-18 տարեկանների մրցապայքարում:
Բոլոր մենամարտերն էլ կարևոր են, սակայն ադրբեջանցիների դեմ պայքարն առանձնահատուկ է, քանի որ այդ պայքարում պատասխանատվությունը շատ ավելի մեծ է: Բացի այդ, Օլիմպիական կոմիտեի կողմից կա հրահանգ. «Եթե պատրաստ չես, մի՛ մենամարտիր»: Ադրբեջանցիները մեզ համար լուրջ մրցակիցներ չեն»,- ասաց Հ. Ղուկասյանը:
Արմֆայթինգ ֆեդերացիայի նախագահը նաև նշեց, որ թեև Ադրբեջանի հավաքականն ուներ 30 ներկայացուցիչ, սակայն թիմային հաշվարկով Հայաստանը գրավեց առաջին տեղը, քանի որ բոլոր մարզիկներն էլ հաղթել են: Վրաստանը գրավեց երկրորդ, իսկ Ադրբեջանը` երրորդ տեղը: