2011 թվականի նոյեմբերի 10-13-ը Բելգիայի Գենտ քաղաքում կայացավ ջու-ջուցուի (GWM) Մ-21 տարեկանների աշխարհի առաջնությունը: 56 կգ քաշային կարգում գերազանց ելույթ ունեցավ Գերմանիայի դրոշի ներքո հանդես եկող 19-ամյա հայազգի մարզիկ Աշոտ Առուստամյանը` հռչակվելով 2011 թվականի աշխարհի չեմպիոն:
7 մարզիկները բաժանվել էին 2 խմբի: A խումբը, որտեղ ընդգրկված էին 3 մարզիկներ, ավել ուժեղ էր, քանի որ Աշոտից զատ, այստեղ էր նաև մրցաշարի մյուս ֆավորիտը` Ֆրանսիայի ներկայացուցիչ Ֆաբիեն Բիտեաուն, ում նկատմամբ էլ մեր մազիկը 22:21 հաշվով տանելով դժվարին հաղթանակ և հերթական անգամ ցույց տալով իր բարձր կարգը, դուրս եկավ եզրափակիչ:
Եզրափակիչում Առուստամյանին պետք է փորձեր դիմակայել կոլումբիացի մարզիկ Ջեյսոն Մորան, սակայն ապարդյուն. Աշոտը 27:10 հաշվով ջախջախեց վերջինիս և չեմպիոնական գեղեցիկ վերջակետով ավարտեց մրցաշարը:
«Առաջին լրատվական»-ի հետ զրույցում աշխարհի չեմպիոնը նշեց. «Ֆրանսիացու հետ պայքարը ծանր ստացվեց: Նա լավ էր պատրաստված և ամբողջ մենամարտի ընթացքում ծավալվեց հավասար պայքար: Բացի այդ, կար մարզավիճակի խնդիր, քանի որ առաջնությունից առաջ կարճ ժամանակահատվածում ստիպված էի քաշ գցել: Եզրափակիչում պայքարն ավելի հեշտ ստացվեց, ես վերահսկում էի իրավիճակը և կարողացա հասնել անհրաժեշտ արդյունքի»: