Հայերի մաշկը համարվում է յուղոտ։ Դա նպաստում է, որ մաշկը ուշ ծերանա: Սակայն հայերին խորհուրդ է տրվում յուղոտ մաշկը պահպանել արևի ճառագայթներից,- այս մասին այսօր հրավիրված ասուլիսում տեղեկացրեց բժիշկ, մաշկաբան Գայանե Վարդանյանը: Սակայն մաշկաբանի խոսքերով, շատ կարևոր է իմանալ մաշկը ճիշտ խնամելու եղանակները: Այսպես, ձմռանը ջերմաստիճանի նվազման հետ մեկտեղ մաշկը ջրազրկվում է, հետևաբար անհրաժեշտ է խոնավեցնող քսուկներով պահպանել թեփոտումից և ջրազրկումից: Խոնավեցնող քսուկները անհրաժեշտ է քսել տնից դուրս գալուց մեկ ժամ առաջ, իսկ ավելի նախընտրելի է՝ երեկոյան ժամերին: Ի դեպ, ձմռանը բոլոր բնակարանները ջեռուցվում են, և մաշկաբանը խորհուրդ տվեց մաշկի պահպանման համար որոշակի խոնավություն ապահովել:
