Ինչպես նշում է The Financial Times թերթը, հնարավոր է, որ Սարկոզի-Մեդվեդեւ-Մերկել հանդիպումը մտնի պատմության մեջ: Այս մասին գրում են «Արտաքին հարաբերությունների եվրոպական խորհրդի» կողմից հրատարակված «Բազմաբեւեռ Եվրոպայի ուրվականները» զեկույցի հեղինակներ Մարկ Լեոնարդը եւ Իվան Կրաստեւը: «Այսօրինակ գագաթնաժողովի անցկացումն ինքնին նշանակում է, որ ԵՄ միաբեւեռության վերջը եկել է»,- նշում են նրանք:1990-ականներին կարծում էին, թե ԵՄ-ն եւ ՆԱՏՕ-ն պետք է մեծանան, երբ բոլոր եվրոպական երկրները հայտնվեն այնտեղ: Այժմ Ռուսաստանը բավականին ամրապնդվել է, որպեսզի բացեիբաց հայտարարի նոր անվտանգության ճարտարապետության մասին, իսկ Թուրքիան վարում է ավելի անկախ քաղաքականություն եւ ցանկանում է մեծացնել իր դերը: Ի հավելումն սրա, ըստ հեղինակների, ԱՄՆ-ն դադարել է «եվրոպական տերություն համարվել», քանի որ ամբողջությամբ զբաղված է Աֆղանստանով, Իրանով եւ ամրապնդվող Չինաստանով:
Այսպիսով, Եվրոպայում ի հայտ են գալիս երեք բեւեռներ` Ռուսաստան, Թուրքիա եւ ԵՄ: Նրանք բոլորը մշակում են «հարեւանության քաղաքականություն», որի հիմնական նպատակն է տարածել իրենց ազդեցությունը Բալկաններում, Արեւելյան Եվրոպայում, Կովկասում եւ Միջին Ասիայում:
Դովիլի գագաթնաժողովի օրակարգը ճիշտ էր ընտրված, բայց մասնակիցների ցանկը սխալ էր կազմված: Նրանք Եվրամիությանն առաջարկում են «անվտանգության մասին եռաերկխոսություն» սկսել Թուրքիայի եւ Ռուսաստանի հետ: Պետք է ձգտել ստեղծել եռակողմ Եվրոպա, եւ ոչ թե եռաբեւեռ: Սա թույլ կտա պահպանել ԵՄ-ն, Ռուսաստանը` պոստիմպերիալիստական, իսկ Թուրքիան` եվրոպական: