Դեկտեմբերի 16-ին Գրիգոր Ամալյանի ղեկավարած Հեռուստատեսության և ռադիոյի ազգային հանձնաժողովը հերթական անգամ զրկեց «Ա1+» հեռուստաընկերությանը եթեր ունենալու հնարավորությունից: «Ա1+» հեռուստաընկերությունն արդեն երկու հայց է ներկայացրել Վարչական դատարան` վիճարկելու ՀՌԱՀ նախագահ Գրիգոր Ամալյանի գործողությունները: «Ա1+» հեռուստաընկերության տնօրեն Մեսրոպ Մովսեսյանը մամուլի ասուլիսի ժամանակ տեղեկացրել է, որ ինքը դատական հայց է ներկայացնելու` ընդդեմ Ամալյանի, որն իրեն անհիմն վիրավորել է և անվանել կեղծարար: Փարիզում գործող «SOS-CAMPING-LOISIRS» ընկերությունը, որի բաժնետիրոջը և մասնավորապես Աննա Տանելյանին, Ամալյանը համարել է մեռած հոգիներ, նամակով պատիվ են պահանջել Ամալյանից, իսկ ՀՌԱՀ-ից` հիմնավոր պատասխան, թե ինչու չեն վստահել հավաստագրին, համաձայն որի`պարտավորվում են կատարել 280 հազար եվրոյի ներդրում: Մեսրոպ Մովսեսյանը հայտարարել է, որ առկա ֆինանսական փաստաթղթերով, անգամ առանց երկու ընկերությունների խոստացած 120 հազար դոլարի ներդրման, «Մելտեքս» ՍՊԸ-ն ապահովում էր մրցութային փաթեթի իրականացումը, մասնավորապես` մրցութային փաթեթի տեխնիկական իրականացման համար անհրաժեշտ մոտ 680 հազար դոլարի փոխարեն «Ա1+» հեռուստաընկերությունը հիմնավորված ներկայացրել է 700 հազար դոլար ներդնելու վերաբերյալ փաստաթղթեր, որոնք կասկածի տակ դնելու որևէ պատճառ չկա: Մեսրոպ Մովսեսյանը պարզաբանել է, որ «SOS-CAMPING-LOISIRS»-ի հետ «Ա1+»-ը համագործակցում է 2003 թ-ից, և գրեթե բոլոր մրցութային փաթեթներում եղել է նրանց հետ համագործակցության հավաստագիր: «Ֆորում» իրավունքի կենտրոնի տնօրեն Տիգրան Տեր-Եսայանն էլ հավելել է, որ այդ ՀՌԱՀ կայացրած որոշման նպատակն է «Ա1+»-ին հարկադրել` պայքարելու և արդարություն որոնելու դատական տարբեր ատյաններում: Իսկ «Ա1+»-ը կրկին իր իրավունքները վերականգնելու համար պայքարելու է մինչև Մարդու իրավունքների եվրոպական դատարան: