Այս տարվա երրորդ եռամսյակում բանկային համակարգի վարկային ներդրումների ծավալն ավելացել է 40.6%-ով և կազմել 1 տրլն 114 մլրդ դրամ: ԿԲ հրապարակած «Բանբերի» համաձայն՝ վարկային ներդրումների աճ գրանցվել է բոլոր մարզերում: Առավել բարձր աճի տեմպ արձանագրվել է Սյունիքի, Շիրակի և Արագածոտնի մարզերում, համապատասխանաբար՝ 76.9%, 72.8% և 58.0%:
Վարկային ներդրումների տարածքային կենտրոնացվածությունը մնում է բարձր. Երևանին բաժին է ընկնում վարկերի 66.1%-ը: Այս ընթացքում Երևանում վարկային ներդրումներն ավելացել են 35.9%-ով (194.7 մլրդ դրամով), իսկ մարզերում և ԼՂՀ-ում՝ 50.8%-ով (127.1 մլրդ դրամով):
ՀՀ մյուս 10 մարզերում և ԼՂՀ-ում վարկերի աճը հիմնականում պայմանավորվել է արդյունաբերության (հիմնականում՝ էներգետիկա, սննդամթերք), սպառողական, գյուղատնտեսության, առևտրի և շինարարության ճյուղերի վարկերի՝ համապատասխանաբար 75.6% (կամ 37.6 մլրդ դրամ), 36.5% (կամ 23.1 մլրդ դրամ), 40.8% (կամ 18.4 մլրդ դրամ), 32.4% (կամ 12.0 մլրդ դրամ) և 85.4% (կամ 11.0 մլրդ դրամ) աճով: ՀՀ գրեթե բոլոր մարզերում (բացառությամբ Տավուշի մարզի) և ԼՂՀ-ում գրանցվել է արդյունաբերության վարկավորման աճ:
Ընդհանուր վարկերի բաշխվածությունը տնտեսության ճյուղերում ըստ մարզերի բևեռացված բնույթ ունի և կենտրոնացված է Երևանում (բացառությամբ գյուղատնտեսության ճյուղի. Երևանին բաժին է ընկնում գյուղատնտեսական ընդհանուր վարկերի 7%-ը): Երևանում կենտրոնացված են սպառողական (53.9%) և արդյունաբերության (61.9%) վարկերը:
Փոքր և միջին բիզնեսին տրամադրված վարկերի ծավալներն ավելացել են 45.5%-ով կամ 115.7 մլրդ դրամով: Ընդհանուր վարկային ներդրումների կազմում փոքր և միջին բիզնեսին տրամադրված վարկերի տեսակարար կշիռը կազմել է 33.2%:
