2011թ. դեկտեմբերի 10-ին` Լեռնային Ղարաբաղի Հանրապետության անկախության հանրաքվեի օրը, հնդկահայ համայնքը և Կալկաթայի Հայոց մարդասիրական ճեմարանը մեծ հանդիսությամբ տոնել են Ղարաբաղի անկախության 20-ամյակը, որը կրում էր «Ղարաբաղ, ես քեզ սիրում եմ» խորագիրը:
Բեմահարթակում Մարդասիրականի սաները Արցախի հանդեպ ունեցած իրենց սերն արտահայտել են հայրենասիրական մի շարք ստեղծագործություններով:
Նըանք ասմունքել են Գուրգեն Գաբրիելյանի «Ղարաբաղ», «Իմ Ղարաբաղ» Սիլվա Կապուտիկյանի «Ղարաբաղի բարբառը», «Հայոց բարդին» և այլ բանաստեղծություններ` նվիրված Արցախին, երգչախումբն էլ ներկայացրել է Կոմիտասի «Առավոտ լուսաբեր» Ս. Սահակյանի «Գետաշեն», Ա. Հեքիմյանի «Ղարաբաղցին», Ռ. Ամիրխանյանի «Երկիր հայրենի», Ա. Սմբատյանի «Հայաստան» և հայրենասիրական այլ երգեր, պարախումբն էլ Ա. Գևորգյանի «Արցախ» երաժշտության ներքո պարել է հաղթական մի պար:
Ձեռնարկն ավարտվել է հնդկահայոց հոգևոր հովիվ, հայոց մարդասիրական ճեմարանի կառավարիչ Տեր Խորեն վարդապետ Հովհաննիսյանի օրհնության խոսքով: Հայր Սուրբը շնորհավորեց ներկաներին Արցախի անկախության առիթով և համայն հայության համար շատ թանկ համարելով Արցախի անկախությունը` ի մասնավորի ասել է. «Ղարաբաղի ազատագրումը և անկախության հռչակումը բացառիկ պատմա-կան կարևորություն և նշանակություն ունի աշխարհասփյուռ հայության համար:
Ցեղասպանություն ապրած և հայրենազրկված ժողովրդի միջից Ղարաբաղյան հաղթանակով պարտվողի և կորցնողի կարծրատիպը մեկընդմիշտ ջնջվեց: Մեր մեջ բույն դրած նահատակ հայի կերպարը խորտակվեց, և փարոսի նման հառնեց հաղթող, պահանջատեր հայը` Միացյալ Հայաստանի տեսլականով:
Տակավին վաղ է հաղթանակի գինով արբենալ: Մութ ամպերը ամբողջությամբ դեռ չեն հեռացել հայրենի մեր երկնակամարից: Արյան գնով պատերազմում ձեռք բերած հաղթանակը պետք է ամրագրել քրտնքի` տնտեսական պատերազմում, որը պարտք ու պարտավորություն է յուրաքանչյուր հայի համար»:
Օրվա առիթով Սուրբ Նազարեթ եկեղեցու վարչությունը կազմակերպել էր տոնական հյուրասիրություն:
