Միացյալ Նահանգների Կոնգրեսի Ներկայացուցիչների պալատի՝ երեքշաբթի օրն ընդունած թիվ 306 բանաձևը, որով ամերիկացի օրենսդիրները Թուրքիայի իշխանություններին կոչ են անում վերադարձնել հայկական, հունական և ասորական եկեղեցիներից բռնագրավված ունեցվածքը, շատ կարևոր փաստաթուղթ է, որից Թուրքիան պետք է լրջագույնս զգուշանա: «Առաջին լրատվական»-ի հետ զրույցում նման տեսակետ հայտնեց Հայոց ցեղասպանության թանգարան-ինստիտուտի տնօրեն Հայկ Դեմոյանը:
«Այս բանաձևը հետևանքներ է ունենալու Թուրքիայի համար: Վերջապես, բազմաթիվ վերլուծաբանների, այդ թվում՝ իմ երկար շեշտադրումներից հետո սկսվեց իրատեսական և միջազգային իրավունքին՝ Լոզանի պայմանագրին համապատասխան մի նախագիծ: Ես տարիներ առաջ բազմիցս ասել եմ, որ այնտեղ, որտեղ հաջողության չենք հասնում և ամեն անգամ նույն կետի վրա ենք մնում, ավելի լավ է նոր որակի աշխատանք սկսել: Ի պատիվ այն մարդկանց, ովքեր աշխատել են այս ուղղությամբ, ասեմ, որ շեշտադրումը ճիշտ և գրագետ է ընտրվել և կարող է արդյունքներ ապահովել: Այն, ինչ շոշափելի և տեսանելի է, արդյունք ստանալու հնարավորություն է ընձեռում, պետք է աշխատել դրա ուղղությամբ: Իսկ արդյունք ստացանք, քանի որ այն, ինչ մենք ուզում ենք՝ համահունչ է գործող միջազգային օրենքներին»,- ասաց Հայկ Դեմոյանը՝ ավելացնելով, որ բանաձևը պետք է լուրջ անհանգստության տեղիք տա Թուրքիային:
Նշենք, որ թիվ 306 բանաձևը Կոնգրեսի Ներկայացուցիչների պալատը քվեարկության էր դրել այսօր: Բանաձևն ընդունվել է: Այն պաշտոնական Անկարային հորդորում է վերջ տալ կրոնական խտրականությանը, երկրի կրոնական փոքրամասնություններին թույլատրել առանց սահմանափակման պատարագներ մատուցել ու այլ կրոնական ծեսեր անցկացնել:
Հիշեցնենք նաև, որ դեռ մի քանի ամիս առաջ` հուլիսի 20-ին, Ներկայացուցիչների պալատի Արտաքին հարաբերությունների հանձնաժողովը հաստատել էր այս բանաձևի տեքստը` ձայների գերակշիռ` 43 կողմ, 1 դեմ հարաբերակցությամբ: Բանաձևի հեղինակներն են Կալիֆոռնիայից ընտրված հանրապետական Էդ Ռոյսն ու նույն նահանգը ներկայացնող դեմոկրատ Հովարդ Բերմանը:
