«Օրրան» բարեգործական-հասարակական կազմակերպությունն այս տարի որոշել է Ամանորն այլ կերպ նշել, քան անցած տարիներին: Անցած տարի «Օրրանում» կազմակերպվել էր մեկ հանդես, որի ընթացքում Ձմեռ պապը նվերներ էր բաժանել երեխաներին, իսկ այս տարի շատ ակտիվ են կազմակերպությունները: Այս մասին «Առաջին լրատվական»-ի հետ զրույցում տեղեկացրեց «Օրրան» բարեգործական-հասարակական կազմակերպության լրատվության ու հասարակայնության կապերի պատասխանատու Սուսաննա Մանուկյանը` պատմելով Ամանորի նախաշեմին կազմակերպվելիք միջոցառումների մասին:
«Այս տարի նախատեսվում է միջոցառումների շարք: Մեզ այսօր հյուր կգան Երևանի թիվ 182 դպրոցի 11-րդ դասարանի աշակերտները, որոք պատրաստել են ներկայացում՝ Համո Սահյանի «Ինձ բացակա չդնեք» խորագրով, իսկ վաղը` դեկտեմբերի 16-ին, «Օրրան» կգան Վալերի Բրյուսվի անվան լեզվաբանական համալսարանի ուսանողները` քաղցրավենիքով, նվերներով»,- տեղեկացրեց Ս. Մանուկյանը` հավելելով, որ միջոցառման խորագիրը կարծես առաջին հայացքից չի առնչվում Ամանորի հետ, սակայն ներքին կապ ունի:
Այս տարի «Օրրանի» սաները կավից պատրաստել են տոնածառի խաղալիքներ, և ցուցահանդես վաճառք է իրականացվել, որի մեծ մասը գնել է «Յուքոմ» ընկերությունը: Մեզ հետ զրույցում Ս. Մանուկյանը նշեց, որ դա չի եղել ինքնանպատակ և տեղավորվել է «Օրրանի» առաքելության սկզբունքների մեջ:
«Երեխաները որոշել են իրենց պատրաստած աշխատանքները վաճառելով՝ փոքրիկների համար գնել ձմեռային ճտքավոր կոշիկներ»,- ուրախությամբ հայտնեց նա` հավելելով, որ եթե ամեն տարի «Օրրանը» այդ երեխաների ընտանիքներին հանձնում էր սննդամթերով լի զամբյուղ, սակայն այս տարի որոշել է գումար տալ վերջիններիս:
Այսօր և վաղը «Օրրանում» երեխաները ամանորյա հանդեսներ կկազմակեևրպեն:
Ներկայումս «Օրրանի» հոգածության ներքո է գտնվում 93 երեխա:
