ԱԺ օրակարգում դեռևս պահպանվել է «Լեզվի մասին» օրենքում փոփոխություններ կատարելու նախագիծը, որի նպատակն է օրենսդրական հիմք ստեղծել Հայաստանում օտարալեզու դպրոցներ հիմնելու համար: Բացի հասարակական նախաձեռնություններից` Հանրային խորհուրդը ևս դեմ է արտահայտվել «Լեզվի մասին» օրենքում փոփոխություններ կատարելու նախագծին: Սակայն հաշվի առնելով այն հանգամանքը, որ օրենքը դեռևս չի հանվել օրակարգից, կարելի է եզրակացնել, որ իշխանությունները անգամ իբրև թե հանրության ձայնը արտահայտելու համար ստեղծված Հանրային խորհրդի ասածների հետ հաշվի չեն նստում:
Հանրային խորհրդի գենդերային և ժողովրդագրական հարցերի հանձնաժողովի նախագահ Ելենա Վարդանյանը մեզ հետ զրույցում նշեց, թե հանգամանքը, որ օրենքի քննարկումն այսքան ձգձգվել է, վկայում է այն մասին, որ ԱԺ-ում էլ չկա վերջնական համոզմունք այդ օրենքի վերաբերյալ:
«Ես կտրականապես դեմ եմ «Լեզվի մասին» օրենքի փոփոխությանը, բայց ես դեմ չեմ կարող լինել օտարալեզու դպրոցներ բացելուն: Ինձ համար հասկանալի չէ, թե ինչու պետք է փոխել օրենքը, եթե մենք ուզում ենք, որ մեր երեխաները օտար լեզու սովորեն: Լեզու սովորելը օրենքով չեն պարտադրում կամ արգելում»:
Ըստ Ելենա Վարդանյանի, պետք է հստակ տարանջատել «Լեզվի մասին» օրենքը օտարալեզու դպրոցներ բացելու առաջարկից, քանզի «Լեզվի մասին» օրենքում փոփոխություն կատարվում է միայն այն դեպքում, երբ ցանկանում ենք ընդունել, որ Հայաստանում պաշտոնական երկու կամ մի քանի լեզու կա. «Դպրոցում երեխային լեզու սովորեցնելու համար «Լեզվի մասին» օրենք փոխելն անիմաստ է»:
