Դեկտեմբերի 20-ին ՀՀ Ազգային ժողովի նախագահ Հովիկ Աբրահամյանն ընդունեց Եվրոպական խորհրդարանի պատգամավոր, Հայաստանի հարցերով հիմնական զեկուցող Տոմաշ Պորեբային:
ԱԺ նախագահը բարձր գնահատեց պատգամավորի այցելությունը Հայաստան և ԼՂՀ՝ նշելով, որ այն լավ հնարավորություն է ընձեռում անմիջականորեն ծանոթանալու ինչպես Հայաստանին և տարածաշրջանին, այնպես էլ Հայաստան-Եվրամիություն հարաբերություններում Հայաստանի մոտեցումներին: Հայաստանն ակնկալում է իրավիճակի ճշմարտացի ներկայացում Եվրախորհրդարանում: Հովիկ Աբրահամյանը կարևորեց Եվրամիության հետ մերձեցումը, ինչպես նաև եվրոպական երկրների հետ երկկողմ շփումները:
ՀՀ ԱԺ նախագահը նշեց, որ Հայաստանը ողջունել է Արևելյան գործընկերության ծրագիրը և դրա շրջանակներում ԵՄ անդամ պետությունների, ԵՄ-ի արևելյան հարևանների միջև համագործակցության խորհրդարանական պլատֆորմի` «Եվրանեսթի» ձևավորման գաղափարը: Նշելով, որ ինքն առաջինն էր ողջունել այդ գաղափարը, Հովիկ Աբրահամյանը վստահություն հայտնեց, որ այն կնպաստի Եվրոպական խորհրդարանի հետ հարաբերությունների խորացմանը և տարածաշրջանի երկրների միջև նոր համագործակցության հնարավորությունների ստեղծմանը: ԱԺ նախագահը շնորհակալություն հայտնեց, որ կառույցի վերաբերյալ Հայաստանի բոլոր առաջարկությունները ընդունվել են, և պատրաստակամություն հայտնեց ամեն կերպ նպաստել «Եվրանեսթի» կայացմանը:
Եվրոպական խորհրդարանի պատգամավոր Տոմաշ Պորեբան, շնորհակալություն հայտնելով հանդիպման համար, նշեց, որ Հայաստանի Հանրապետություն և ԼՂՀ է այցելել տեղում իրադրությանը ծանոթանալու, անհրաժեշտ տեղեկություններ ստանալու, հայկական կողմի մտահոգություններին և ակնկալիքներին տեղեկանալու համար: Նա բարձր գնահատեց Հայաստանի մասնակցությունը «Եվրանեսթին», որը հնարավորություն է` ներկայացնելու Հայաստանի տեսակետները:
Հովիկ Աբրահամյանն անդրադարձավ այս տարվա հուլիսին Բրյուսել կատարած այցին, որի ընթացքում բազմաթիվ հանդիպումներ է ունեցել Եվրոպական խորհրդարանի ներկայացուցիչների հետ և ներկայացրել հայկական կողմի մոտեցումները: ԱԺ նախագահը խոսեց նաև դեկտեմբերի 1-2-Ը Բրյուսելում կայացած ԵՄ-Հայաստան խորհրդարանական համագործակցության հանձնաժողովի հերթական` 11-րդ նիստի մասին, որի եզրափակիչ հայտարարությունը և առաջարկությունները գնահատեց որպես հավասարկշռված և օբյեկտիվ:
Զրուցակիցներն անդրադարձան Հայաստանի և եվրոպական կառույցների համագործակցությանը վերաբերող մի շարք հարցերի: Հովիկ Աբրահամյանը համոզմունք հայտնեց, որ Եվրախորհրդարանի պատգամավորի այցը Հայաստան և ԼՂՀ կնպաստի, որ նրա կողմից պատրաստվող զեկույցը լինի անաչառ և օբյեկտիվ:
ՀՀ ԱԺ հասարակայնության և տեղեկատվության միջոցների հետ կապերի վարչություն