ՀՅԴ Բյուրոյի Հայ դատի և քաղաքական հարցերով գրասենյակի պատասխանատու Կիրո Մանոյանը մամուլի ասուլիսի ժամանակ հայտարարեց, որ հաջորդ տարի Լեռնային Ղարաբաղի հարցով բանակցությունները կակտիվանան, քանի որ միջնորդները չեն ցանկանում, որ տարածաշրջանում պատերազմ լինի, միաժամանակ կանխատեսեց, որ այդ բանակցություններում առաջընթաց չի լինի ինչպես Ադրբեջանի, այնպես էլ Թուրքիայի կեցվածքի պատճառով: Նա կարծիք հայտնեց, որ մինչև ԼՂ հարցում չլինի առաջընթաց, առաջընթաց չի լինի նաև հայ-թուրքական հարաբերություններում: «Հայ-թուրքական արձանագրությունները Թուրքիային տվել են այն կարևոր լծակը, որով նա կարողանում է իր ցանկությունները պարտադրել»,- ասաց դաշնակցական գործիչը: Կիրո Մանոյանն ուշադրություն հրավիրեց այն բանի վրա, որ Իրանում և հենց Իրանի շուրջ տեղի են ունենում հետաքրքիր զարգացումներ: Այդ փոփոխությունները դաշնակցական գործիչը կապում է առաջին հերթին Իրանի ԱԳ նախարար Մանուչեհր Մոթաքիի պաշտոնանկության հետ: Ինչ վերաբերում է ԼՂ խնդրի շուրջ ընթացող բանակցություններին, ապա դաշնակցական գործիչը կանխատեսեց, որ, եթե բանակցությունները տապալվեն, ապա Ադրբեջանը կարող է դիմել պատերազմի: Կիրո Մանոյանը սխալ համարեց ՀՀ իշխանությունների այն մոտեցումը, որ միայն պատերազմի դեպքում ՀՀ-ն կճանաչի ԼՂ անկախությունը: Նրա կարծիքով` ՀՀ իշխանությունները 2011 թվականին էլ չեն ճանաչի ԼՂ անկախությունը: Իսկ թուրք-իսրայելական հարաբերություններին անդրադառնալով՝ դաշնակցական գործիչը նշեց, որ երկու կողմից էլ կա ցանկություն` բարելավելու հարաբերությունները: Նա նշեց, որ թե՛ Թուրքիան, թե՛ Իսրայելը հայտարարում են, որ իրենք ռազմավարական գործընկերներ են: