Հայ ազգային կոնգրեսի արտաքին կապերի պատասխանատու Վլադիմիր Կարապետյանը, «Առաջին լրատվականի» հետ զրույցում մեկնաբանելով Սերժ Սարգսյանի՝ նախօրեին ՀՀԿ քսանամյակի տոնակատարության ժամանակ հնչեցրած ելույթը, կարծիք հայտնեց, որ այդ խոսքերը որևէ կապ չունեն իրականության, այն արժեքային համակարգի հետ, որը դավանում է ՀՀԿ-ն: «Որը շարունակում է մարդկանց անազատության մեջ պահել գաղափարների պատճառով, որը ոչ մի բան չի արել մարտիմեկյան սպանդի մարդասպաններին հայտնաբերելու համար և փաստորեն լռում է, դրա մասին չի խոսում, և հնարավորն անում է, որպեսզի քողարկի ստեղծված իրավիճակը, որը շարունակում է շրջափակման մեջ պահել Ազատության հրապարակը, և ուր կոռուպցիան համատարած է, ինչի մասին խոսում են միջազգային բոլոր կազմակերպությունները: Հիշեցնեմ, որ դեռ 2007 թվականին Սերժ Սարգսյանը հրապարակայնորեն խոստանում էր պատժել բոլոր այն պաշտոնյաներին, որոնք ներգրավված են կոռուպցիայի մեջ: Անցել է երեք տարի այդ խոստումից, սակայն կոռուպցիան Հայաստանում միայն խորացել և բարգավաճել է: Սերժ Սարգսյանի հիմնական պրոբլեմն այն է, որ նա իր խոսքերի տերը չէ. նրա խոսքերը կապ չունեն իրականության հետ»,- նշեց Կարապետյանը:
Լուսանկարը` PanarmenianPhoto-ի