Ամեն տարեվերջին ռուսական Коммерсант Власть ամսագիրն ամփոփում է տարվա քաղաքական իրադարձությունները և տարբեր անվանակարգերում նշում առավել աչքի ընկնող քաղաքական գործիչներին:
«Քծնողների» լավագույն տասնյակում առաջին հորիզոնականը զբաղեցնում է Չեչնիայի ղեկավար Ռամզան Քադիրովը: Նախորդ տարի այդ ցուցակում նա 3-րդն էր: Այդ տարի նա ասել էր, թե միակ բանը, որը չի հերիքում Պուտինին, չեչեն լինելն է:
Այս տարի Ռամզանը գերազանցել է ինքն իրեն: Նա ասել է. «Իմ կուռքը Պուտինն է: Նա և՛ չեչեն է, և՛ ռուս: Եվ նա ամեն ինչ տվել է մեզ այս երկրի վրա»,- եզրափակել է Չեչնիայի ղեկավարը:
Այս ցուցակում տեղ են զբաղեցրել նաև մի շարք այլ քաղաքական գործիչներ` նահանգապետեր, պատգամավորներ, Ռուսաստանի գլխավոր րաբբին: Ընդ որում, հիմնական քծնանքներն ուղղված են եղել Ռուսաստանի վարչապետ Վլադիմիր Պուտինին:
Հայտնի երգիչ Բորիս Մոիսեևն էլ, որը հայտնի է իր ոչ ավանդական սեռական կողմնորոշմամբ, նույնպես հիացմունք է հայտնել Պուտինի մասին. «Հենց Պուտինն է, որ ինձ կոչում է տվել և ինձ վրա ուշադրություն դարձրել: Ես միշտ նրանով հիացել եմ: Մեդվեդևն էլ է դուրս գալիս. նա մոդայիկ, ուժեղ, հմայիչ առաջնորդ է, որը մտածում է իր պետության մասին: Ընդհանրապես, հիմա դժվար է ընտրել մեկին այս գեղեցիկ տանդեմից: Իմ կամքը լիներ, երկուսին էլ կնշանակեի»,- ասել է Մոիսեևը:
