ՀՀ փոխվարչապետ, տարածքային կառավարման նախարար Արմեն Գևորգյանի մոտ այսօր կայացել է ՀՀ-ում մարդկանց շահագործման (թրաֆիկինգի) հարցերով խորհրդի հերթական նիստը։
Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին հայտնում են, որ քննարկվել են թրաֆիկինգի զոհերին հատուցում տրամադրելու նպատակով պետության կողմից համապատասխան հիմնադրամի ստեղծման հարցը:
Խորհուրդը որոշել է, որ ՀՀ աշխատանքի և սոցիալական հարցերի նախարարությունը, համագործակցելով շահագրգիռ այլ մարմինների հետ, եռամսյա ժամկետում կուսումնասիրի միջազգային փորձը և առաջարկություններ կներկայացնի հիմնադրամի ձևավորման սկզբունքների մասին` միաժամանակ ներկայացնելով նաև անհրաժեշտ իրավական ակտերի փաթեթ:
Խորհուրդն ի գիտություն է ընդունել ՀՀ սպորտի և երիտասարդության հարցերի նախարար Ա. Պետրոսյանի տեղեկությունը` թրաֆիկինգի կանխարգելմանն ուղղված քարոզչական միջոցառումների մասին: Նշվել է, որ պատրաստվել է սոցիալական գովազդ, որը ցուցադրվում է հանրապետական և մարզային սփռում ունեցող հեռուստաալիքներով:
Միգրացիոն ծառայության պետ Գ. Եգանյանը տեղեկացրել է, որ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ Ա. Սաֆարյանը և ՀՀ մարդու իրավունքների պաշտպան Կ. Անդրեասյանը խորհրդում ընդգրկվելու համաձայնություն են հայտնել:
Քննարկվել է նաև խորհրդի կազմում ՀՀ սփյուռքի նախարարի ու պաշտպանության փոխնախարարի ընդգրկման հարցը: Որոշվել է խորհրդի կազմը սահմանող համապատասխան որոշման մեջ փոփոխություն կատարելու առաջարկով դիմել ՀՀ վարչապետին:
Խորհուրդն ընդունել է միջգերատեսչական աշխատանքային խմբին կից երկու ենթախմբերի ստեղծման առաջարկը: Նշվել է, որ ենթախմբերից մեկը կզբաղվի ազգային ուղղորդման կարգի վերանայմամբ, իսկ մյուս ենթախումբը կուսումնասիրի ԱՄՆ պետքարտուղարության և Եվրոպայի խորհրդի` մարդկանց շահագործման (թրաֆիկինգի) դեմ պայքարի ԵԽ փորձագիտական խմբի (GRETA) զեկույցները և աշխատանքային խմբին առաջարկություններ կներկայացնի:
Խորհրդին կից միջգերատեսչական աշխատանքային խմբի ղեկավար Վ. Կաժոյանը տեղեկացրել է, որ «ՀՀ-ում 2010-2012 թվականների ընթացքում մարդկանց շահագործման (թրաֆիկինգի) դեմ պայքարի կազմակերպման» ազգային ծրագրով մինչև 2011թ. ավարտը կատարման ենթակա միջոցառումների իրականացման վերաբերյալ համապատասխան վերլուծություն կներկայացվի խորհրդի հաջորդ նիստին:
Խորհուրդն անդրադարձել է նաև երևույթի վերաբերյալ հանրային իրազեկման հարցերին: Մասնավորապես տեղեկացվել է, որ այդ խնդիրները լուսաբանող լրագրողների համար կկազմակերպվեն դասընթացներ, սեմինարներ:
Ա. Գևորգյանը հանձնարարել է գործնական քայլեր իրականացնել այդ ուղղությամբ` ներգրավելով նաեւ միջազգային փորձագետների:
Խորհուրդը նաև խրախուսական մրցանակ է սահմանելու լավագույն լուսաբանման համար: Այս կապակցությամբ որոշվել է դիմել լրագրողական մասնագիտական հասարակական կազմակերպություններին` մրցանակի ստեղծման մեխանիզմների վերաբերյալ առաջարկություններ ներկայացնելու և 2011թ. մրցանակակիրների ընտրության համար: Նախատեսվում է, որ նման մրցանակբաշխությունը կդառնա ավանդական: