Այսօր թուրքագետ Անուշ Հովհաննիսյանը և Ազգային արխիվի փոխտնօրեն, պատմաբան Էդգար Հովհաննիսյանը լրագրողներին հայտնեցին, որ ԱՄՆ 9-րդ օկրուգի դաշնային դատարանը վերանայել է 2009 թ. օգոստոսին իր իսկ ընդունած որոշումը, որով արգելվում էր Ցեղասպանության զոհերի ժառանգներին ապահովագրական ընկերություների դեմ հայցեր ներկայացնելու ժամկետի երկարաձգումը: Նմանատիպ որոշում կայացվել էր Կալիֆոռնիայի դատարանների կողմից դեռևս 2000 թ., որը հայցեր ներկայացնելու ժամկետ էր սահմանում մինչև 2010 թ. դեկտեմբերի 31-ը:
«Դատարանի որոշման համաձայն` որևէ ժամկետ չի տրամադրվում, քանի որ Կալիֆոռնիայում ներկայացվող նմանատիպ հայցերը հակասում են ԱՄՆ պաշտոնական քաղաքականությանը, քանի որ հղում են պարունակում Հայոց ցեղասպանությանը, որը ԱՄՆ քաղաքականությունը չի ընդունել: Դեկտեմբերի 10-ին նույն դատարանը, նույն կազմով, և դատավոր Դորոթի Նելսոնը, որը նախորդ անգամ քվեարկել էր որոշմանը կողմ, այս անգամ որոշ փաստերի ազդեցության ներքո փոխեց իր որոշումը՝ թույլ տալով երկարաձգել ժամկետը և չեղյալ համարեց նախորդ որոշումը: Թուրքիան անհանգստացած է, որովհետև նախորդ որոշումը կարող էր շատ ակտիվորեն օգտագործել թե՛ ԱՄՆ, թե՛ ընդհանրապես աշխարհում Հայոց ցեղասպանության ճանաչման և դատապարտման գործընթացը կասեցնելու համար»,- նշեց թուրքագետը:
Պատմաբան Հովհաննիսյանը նույնպես կարևորեց այս գործընթացքը. «Կարևորում եմ, որովհետև նորից 252 բանաձևը բարձրացվել է ամերիկյան օրենսդիր մարմիններում, Ներկայացուցիչների պալատում, որը Հայոց ցեղասպանության ճանաչման բանաձևը նորից կարծես թե մտցնում է լիագումար նիստերի օրակարգ, և թուրքական կողմը իր հերթական վայնասունն է բարձրացրել ու ամեն կերպ փորձում է ճնշումներ գործադրել»:
