Ինչպես փոխանցում է «Ասպարէզ» թերթը, հայերի մի խումբ բողոքի ակցիաներով է դիմավորել ամերիկյան հայտնի բասկետբոլիստ Քոբի Բրայանտին, որն իր թիմի` «Լոս Անջելես Լեյքերզի» հետ ժամանել է Տորոնտո` մասնակցելու NBA-ի հերթական խաղին: Հայերը բռնել են «Քոբի, ճիշտ գործիր», նաև մի շարք այլ պաստառներ, որոնք նշում էին Թուրքիայում մարդու իրավունքների վիճակի մասին:
Հիշեցնենք, որ անցած շաբաթ Քոբին Թուրքիայի ազգային ավիափոխադրողի հետ ստորագրել է երկու տարվա պայմանագիր` դառնալով աշխարհում նրա «դեսպանը»` ընկերության դեմքը:
Այս որոշումը հարուցել է Ամերիկայի հայերի բուռն դժգոհությունը, իսկ Հայկական երիտասարդական ֆեդերացիան բողոքի ակցիաներ է սկսել նրա դեմ` կոչ անելով վերհիշել Դարֆուրը և չպաշտպանել ցեղասպանությունները հերքողներին:
Ինչպես հաղորդել է Տորոնտոյի Հայ դատի գրասենյակի ղեկավար Ռուբեն Ջանբազյանը, «Տորոնտոյի մեծ հայկական համայնքը զարմացած է, և մենք շարունակելու ենք ճնշում գործադրել Բրայանտի վրա Կանադա նրա այցելության ժամանակ` խնդրելով չեղյալ համարել պայամանգիրը և հայտարարություն անել, որ ինքը կապ չունի թուրքական կառավարության գործողությունների հետ, հատկապես՝ կապված 252 բանաձևի ճանաչման դեմ ուղղված քայլերի»:
Հայերը խոստանում են այդ մայրցամաքի մյուս քաղաքներում էլ իրականացնել նմանատիպ ակցիաներ, եթե Քոբին չհրաժարվի իր այդ քայլից:
