News Georgia-ի փոխանցմամբ՝ Վրաստանի նախագահ Միխեիլ Սաակաշվիլին երեկ երեկոյան տեղի ունեցած Ազգային անվտանգության խորհրդի նիստում հայտարարել է, որ Վրաստանը հավակնում է ԵՄ-ին անդամակցելուն։
Սաակաշվիլին ԵՄ-ի ու Վրաստանի միջև ազատ առևտրի վերաբերյալ բանակցությունների մեկնարկը որակել է որպես ԵՄ-ին Վրաստանի անդամակցության մեկնարկ. «ԵՄ-ն արդեն հաստատել է, որ Վրաստանի հետ պետք է բանակցի ոչ միայն ազատ առևտրային գոտու ձևավորման և անցագրային ռեժիմի վերացման շուրջ, այլև որ Վրաստանը պետք է հետագա տարիներին անդամակցի այդ քաղաքական ու տնտեսական միավորմանը։
ԵՄ-ի վերջին բոլոր գագաթնաժողովներում հայտարարություններ են հնչեցվում, որ Վրաստանն անդամակցելու է ԵՄ-ին։ Մենք եզակի հնարավորություն ենք ստացել այդ կապակցությամբ։ ԵՄ-ի հետ հարաբերություններում նոր փուլի սկիզբը հնարավոր է դարձել Վրաստանում կատարված բարեփոխումների շնորհիվ»։
Վրաստանի վարչապետ Նիկա Գիլաուրին իր հերթին հայտարարել է, որ Վրաստանն աստիճանաբար վերածվում է ԵՄ-ի լիիրավ անդամի։
Հիշեցնենք, որ ԵՄ-ի ու Վրաստանի միջև ազատ առևտրի վերաբերյալ բանակցությունները մեկնարկելու են 2012 թվականի սկզբին։
