Երեկ ուշագրավ տեղեկատվություն հաղորդեցին ադրբեջանական գործակալությունները` սկսվում է Ռուսաստանից Ադրբեջանի գնած Ми-35М տիպի 24 մարտական ուղղաթիռների առաքման գործընթացը:
Ադրբեջանական լրատվական գործակալությունների փոխանցմամբ, մոտ ժամանակներս սկսվելու է Ռուսաստանից Ադրբեջանի գնած մարտական ուղղաթիռների հատկացման գործընթացը… Խոսքը Ми-35М տիպի 24 ուղղաթիռների մասին է, որոնց գնման մասին պայմանագիրը Рособоронэкспорт ընկերությունը և Ադրբեջանի համապատասխան կառույցները ստորագրել են 2010 թ. սեպտեմբերին` Բաքվում…
Առաջին ուղղաթիռն Ադրբեջան է ուղարկվելու Դոնի Ռոստովից… Ми-35М տիպի ուղղաթիռները Ми-24 տիպի ուղղաթիռների արդիականացված տարբերակն են և նախատեսված են հակառակորդի զրահատանկային տեխնիկայի ոչնչացման, ցամաքային զորքերին կրակային աջակցություն ցուցաբերելու, դեսանտի իջեցման ու վիրավորների տարհանման, ինչպես նաև բեռների փոխադրման համար… Այս ուղղաթիռները զինված են գիշերային տեսանելիության սարքերով, Штурм-В տիպի ղեկավարվող հակատանկային հրթիռներով, 80 միլիմետր տրամաչափի С-8 և 240 միլիմետր տրամաչափի С-24 տիպի չղեկավարվող հրթիռներով, 12.7 միլիմետր տրամաչափի գնդացրով, 7.62 միլիմետր տրամաչափի երկու գնդացիրներով, 30 միլիմետր տրամաչափի նռնականետով… Ուղղաթիռի ռմբային բեռնվածությունը կազմում է մինչև 500 կիլոգրամ…
Պաշտոնական Երևանը ժամանակ առ ժամանակ բարձրաձայնում է Ադրբեջանի կողմից Եվրոպայում սովորական զինված ուժերի պայմանագրի խախտման մասին: Մի կողմից` ղարաբաղյան հակամարտության կարգավորման գործընթացում առաջընթացի բացակայությունը, մյուս կողմից` ռազմական ծախսերի աճի, վերազինման փաստերը ստիպում են այլ տեսանկյունից նայել ցանկացած նոր տեղեկատվության: Իսկ այն հանգամանքը, որ խոսքը Հայաստանի ռազմավարական գործընկերոջ` Ռուսաստանի կողմից Ադրբեջանի վերազինման մասին է, իսկապես հետաքրքիր է իմանալ հենց հայկական կողմի պաշտոնական գնահատականը:
Երեկ «Առաջին լրատվական»-ը զրուցեց ՀՀ պաշտպանության նախարարության մամլո խոսնակ Դավիթ Կարապետյանի հետ: Նրան խնդրեցինք գնահատել Ռուսաստանի կողմից Ադրբեջանին մարտական ուղղաթիռներ հատկացնելու գործընթացը… «Ռուսաստանի և Ադրբեջանի ռազմատեխնիկական համգործակցությունը մեզ համար նորություն չէ: Եվ դա չի խոչընդոտում ռազմատեխնիկական ոլորտում հայ-ռուսական համագործակցության խորացմանը, որը շատ բարձր հիմքերի վրա է:
Դա Ռուսաստանի և Ադրբեջանի երկկողմ հարաբերությունների դաշտում է և ոչնչով չի խոչընդոտում, որպեսզի ռազմական ոլորտում Հայաստանի և Ռուսաստանի միջև համագործակցությունը խորանա, որը շատ ավելի բարձր հիմքերի վրա է, քան Ռուսաստան-Ադրբեջան ռազմատեխնիկական համագործակցությունը»: Մեր հարցին, թե որքանով է ռազմական ոլորտի ծախսերի, ներուժի հզորացումը նպաստում ղարաբաղյան հակամարտության խաղաղ կարգավորմանը, և արդոք այս ամենը չի՞ նպաստում ստատուս քվոյի պահպանմանը` Դավիթ Կարապետյանը պատասխանեց. «Սպառազինությունների թույլատրելի չափը Ադրբեջանն է խախտում, որի մասին Հայաստանի ռազմաքաղաքական ղեկավարությունը բազմիցս հայտարարել է միջազգային ատյաններում: Եվ Ադրբեջանի նման սպառազինումը չի կարող մեզ անտարբեր թողնել, Հայաստանն իր հերթին արդիականացնում է և՛ իր սպառազինությունը, և՛ կատարելագործում է Զինված ուժերի մարտունակությունը, որպեսզի հնարավոր վտանգների դեպքում համարժեք արձագանք տա, պաշտպանի սեփական բնակչությանը»:
ԼՂՀ նախագահի մամլո խոսնակ Դավիթ Բաբայանը մեզ հետ զրույցում անդրադառնալով ադրբեջանական ԶԼՄ-ների տեղեկությանը` նկատեց, թե պետք է սպասել, տեսնել` կլինի՞ այդ գործարքը, թե՞ ոչ. «Բայց, այնուամենայնիվ, Ռուսաստանը որդեգրել է այնպիսի քաղաքականություն, երբ զենք և ռազմատեխնիկա է տրամադրում ինչ-որ պետության, անպայման փորձում է հավասարակշռությունը պահպանելու համար տրամադրել նաև այլ պետությունների, և այդ տեսանկյունից խաղաղությունը պահպանելու համար այդպիսի քաղաքականություն է որդեգրել: Տեսնենք, ինչով կզարգանան իրադարձությունները, այնուամենայնիվ բնական է, և իմ կարծիքով` ինչքան Ադրբեջանը շատ է սպառազինվում, այնքան ավելի վատ է անդրադառնում տարածաշրջանում կայունության և խաղաղության պահպանման վրա: Բայց հաշվի առնելով հավասարակշռվածությունը Հայաստանի և Ռուսաստանի միջև, նրանց դաշնակցային հարաբերությունները, չեմ կարծում, որ այդ գործարքով կխախտվի հավասարակշռությունը տարածաշրջանում»:
«Առաջին լրատվական»-ը երեկ դիմեց նաև Հայաստանի արտաքին գործերի նախարարի մամլո խոսնակ Տիգրան Բալայանին: Մեր հարցին ի պատասխան նա նշեց միայն հետևյալը. «Մենք մշտապես բարձրաձայնել և ուշադրություն ենք հրավիրել Ադրբեջանի կողմից ԵՍԶՈւ պայմանագրի խախտումների վերաբերյալ, վերջին անգամ՝ ԵԱՀԿ արտգործնախարարների խորհրդի նիստին` Վիլնյուսում»:
