«Ձեզ ինչո՞ւ չեն սիրում: Երկնիշ տնտեսական աճ ցույց տվեցիք և այլն: Ինչո՞ւ չեն սիրում»,- այսօր ասուլիսի ժամանակ 1994-1998 թթ. ՀՀ ԿԲ նախագահ Բագրատ Ասատրյանը նման հարցադրում արեց ԱԺ ՀՀԿ-ական պատգամավոր Մանվել Բադեյանին:
Բ. Ասատրյանի խոսքով՝ քաղաքական ճգնաժամն ակնհայտ է, դրա դրսևորումն է տնտեսական, սոցիալական իրավիճակը: Բանախոսը նշեց, որ իշխող ուժը որոշակի ծրագրով եկել է, բայց թվերը համեմատելիս, այն, որ խոստացել էին 2-3 անգամ կենսապայմանները լավացնել, աղքատությունը կրճատել, հակառակ պատկերն է ստացվում՝ տնտեսական ցուցանիշներով դեռ չենք հասել 2008-ին: «ՀՀԿ-ն տապալվել է, պետք է բեմից իջնի, և նոր ուժեր գան»,- հայտարարեց Բ. Ասատրյանը:
Մ. Բադեյանը հակադարձեց, թե քաղաքական ճգնաժամ չկա, ինչի ապացույցն էլ այն է, որ խոշոր բախումներ չկան, քաղաքական ուժերի միջև հարաբերությունները մեղմացվեցին: Սոցիալ-տնտեսական վիճակի վերաբերյալ, պատգամավորը նշեց, որ ճգնաժամից հետո բոլոր երկրներում էլ դրությունը վատացել է: Միաժամանակ նա չհամաձայնեց, թե արտագաղթը քաղաքական ճգնաժամի հետևանք է:
Անդրադառնալով ՀԱԿ-ի կողմից ԲՀԿ-ին արված առաջարկին՝ Մ. Բադեյանը շեշտեց, թե չգիտի ինչ առաջարկ է եղել, միաժամանակ այն անվանեց «աբսուրդային» և «անհասկանալի»: Մ. Բադեյանի կարծիքով՝ այդ առաջարկից հետո թմրամոլության կասկածանքով ԲՀԿ որոշ անդամների քրեական հետապնդումը գուցե և անհիմն չէ. «Չի կարելի այդպես ասել, որ ԲՀԿ կեսը թմրամոլ է: Մեր մշակույթի մեջ քաղաքական խիստ մեղադրական եզրեր կան: Իհարկե, ԲՀԿ կեսը նարկոման չէ, իշխանավորները հանցագործ չեն, ընդդիմությունը ապաշնորհ չէ: Իրադարձություններ են եղել, ինչ-որ մարդկանց քրեական հետապնդման են ենթարկել, բայց դուք վստա՞հ եք, որ դա քաղաքական ենթատեքստ ունի, վստա՞հ եք, որ այդ մարդիկ իրոք անմեղ են»: