Ռուսաստանում շաբաթ օրը տեղի ունեցած բողոքի ակցիաներն արդեն իսկ ազդեցություն են թողնում ինչպես այդ երկրի ներքաղաքական իրավիճակի, անձամբ ՌԴ վարչապետ Վլադիմիր Պուտինի, քաղաքական էլիտայի, այնպես էլ հասարակության վրա: «Առաջին լրատվական»-ի հետ զրույցում նման տեսակետ հայտնեց քաղաքագետ Ստեփան Գրիգորյանը:
«Մեծածավալ ակցիաները չեն ցրվում, սակայն ռուսաստանյան իշխանություններն, ուզած-չուզած, հաշտվում են այդ մտքի հետ: Մեկ կամ երկու տարի առաջ, եթե ցույց անելու համար թեկուզ 10 հոգի հավաքվեին, դաժան կերպով կձերբակալվեին և ոստիկանություն կտարվեին: Իսկ հիմա այսքան մեծ ակցիաներն անցան առանց միջադեպերի, առանց ցուցարարների հանդեպ բռնությունների: Սա նշանակում է, որ բողոքի ալիքն այնքան մեծ է, որ ՌԴ իշխանությունն, ուզած-չուզած, դրա հետ հաշվի է նստում: Սակայն իրավիճակը չի հանդարտվի և դժգոհության ալիքը կշարունակվի՝ իր գագաթնակետին հասնելով 2012 թվականի մարտին կայանալիք նախագահական ընտրությունների ժամանակ: Եթե ռուսաստանյան իշխանությունները իրենց ճիշտ պահեն, դուրս չգան խաղաղ ցույցերի դեմ, խաղի կանոններ կձավորվեն, Վլադիմիր Պուտինը նոր կարող է կրկին Ռուսաստանի նախագահ դառնալ, բայց եթե փորձ արվի ընդդիմանալ ժողովրդի կամքին, իրավիճակը կգնա դեպի անկայունացում, դա շատ անցանկալի հետևանքների կբերի ինչպես ՌԴ-ի, այնպես էլ նրա հարևանների համար»,- ամփոփեց Ստեփան Գրիգորյանը:
Հիշեցնենք, որ Մոսկվայում շաբաթ օրը տեղի ունեցած խոշորագույն բողոքի ցույցին, որը կազմակերպել էին անցած խորհրդարանական ընտրությունների արդյունքներից դժգոհ մի շարք կուսակցություններ ու շարժումներ, տարբեր գնահատականներով, մասնակցել էր 35-85 հազար մարդ: Արտոնված հանրահավաքը տևել էր գրեթե 4 ժամ:
