Հայաստանում էլեկտրոնային առևտրի զարգացման գլխավոր խոչընդոտներից մեկը Visa քարտի բացակայությունն է: Հայկական բանկերը քայլեր չեն ձեռնարկում Visa international e-commerce լիցենզիա ստանալու համար: Մեր երկրում գործում են Master քարտերը, բայց դրանց գործարկումն անում է ԱրՔա ընկերությունը, որը դեռ չի տրամադրում այն ծառայությունը, որ կայքում հնարավոր լինի տեղադրել ու օգտագործել այդ քարտերը:
«Առաջին լրատվական»-ի հետ զրույցում «Օվերոլ Սոլուշընզ» ընկերության տնօրեն Դավիթ Քոթանյանը նշեց, որ, առանց ԱրՔա-ի ծառայության, ստացվում է, որ քարտը ոչ ապահով ձևով է օգտագործվում, դրա համար էլ հիմնականում չի օգտագործվում:
«Visa քարտի ձեռքբերումը պարտադիր է: Չես կարող վճարահաշվարկային համակարգ, առցանց խանութ ստեղծել, որը Visa չի ընդունում: Ե՛վ Master-ը, և՛ Visa-ն երկուսն էլ պարտադիր պետք է լինեն»,- նշեց Դ. Քոթանյանը:
Visa international e-commerce լիցենզիան արժի 150 հազ. դոլար, բայց, ըստ Դ. Քոթանյանի, դա մեծ գումար չէ՝ հատկապես հաշվի առնելով, թե տարիների ընթացքում ինչ շուկա է բացվելու. «Բանկերի ներկայացուցիչները ամեն մեկն իր շահն է հետապնդում, և չեն ուզում կիսվել: Իսկ այդ լիցենզիան ձեռք բերելու այլ հնարավորություն չկա, ԿԲ-ն չի կարող, պետք է մասնավոր բանկ լինի»:
Քարտերի միջոցով իրականացված փոխանցումների ծավալը ՀՀ-ում հասել է տարեկան շուրջ 200 մլրդ դրամի, որից 10%-ն՝ էլեկտրոնային գործարքների ծավալն է, ինչն այս պայմաններում վատ ցուցանիշ չէ: «Եթե Visa-ն լինի, մեծ շուկա կբերի ու գործարքների ծավալները միանգամից շատ կտրուկ կաճեն»,- ասաց Դ. Քոթանյանը:
Նշենք, որ անցած հանգստյան օրերին Դիլիջանում էլեկտրոնային առևտրի խնդիրներին նվիրված ՏՀՏ լիդերների ֆորումին հրավիրվել էին նաև բանկերի ներկայացուցիչներ, սակայն նրանք հանդիպմանը չէին եկել:
