Կիրակի օրը նախագահական ընտրություններից հետո, երբ սկսվել են ընդդիմության ելույթները, Բելառուսի տարածքում արգելափակվել են մի շարք ինտերնետային հայտնի կայքեր, որոնք կարող էին նպաստել ընդդիմության հաղորդակցմանը և բողոքի ակցիաների կազմակերպմանը: Այդ կայքերի թվում են Facebook-ը, Twitter-ը, LiveJournal-ը և Gmail-ը:
Բելառուսի տարածքում չեն գործում նաև «Charter 97» ընդդիմադիր կայքը, «Ազատություն» ռադիոկայանը և «Սոլիդարնոստ» թերթի կայքը:
Ձերբակալվել են «Charter 97»-ի լրագրողները, որ ուղիղ ռեպորտաժ են վարել բախումների վայրից:
Լրատվամիջոցները հաղորդում են նաև, որ անհայտ է նախագահի թեկնածու Նեկլյաևի գտնվելու վայրը. վերջինս նախորդ օրը դաժան ծեծի էր ենթարկվել, տեղափոխվել հիվանդանոց, ապա անհայտ անձանց կողմից դուրս հանվել հիվանդանոցից: Այս մասին հաղորդել է «Ազատություն» ռադիոկայանը: Տարբեր տվյալներով, երեկվա ակցիաներին մասնակցել է ավելի քան 40 հազար մարդ: Այսօր ելույթները շարունակվելու են, սակայն իշխանություններն ամեն ինչ անում են, որպեսզի նման բան չկայանա։ Ընդդիմադիր առաջնորդների ձերբակալությունները միտված են հենց դրան:
