ՀՀ բնապահպանության նախարարության կողմից նշանակված՝ Վիշապի այգու կառուցապատման վերաբերյա հասարակական լսումները կարելի է համարել չկայացած: Այս մասին ասվում է «Էկոլուր» հասարակական կազմակերպության տարածած հաղորդագրությունում: Դեկտեմբերի 18ին` ժամը 10:30-ին, քննարկման համար Վիշապի այգի են եկել շրջակա տների բնակիչներ, բնապահպանության նախարարության ներկայացուցիչներ, հասարակական կազմակերպություններ, քաղաքական կուսակցություններ («Ժառանգություն» և Կանաչների կուսակցություն): Սակայն քննարկմանը չեն հայտնվել ո՛չ «ԿԱԷՌ Քոնսթրաքշն» ՍՊԸ-ն, որ սկսել էր այգու կառուցապատումը, ո՛չ Նոր Նորքի թաղապետարանը:
Հիշեցնենք, որ ՀՀ բնապահպանության նախարար Արամ Հարությունյանը բնակիչների և հասարակայնության պահանջով Վիշապի այգում կանգնեցրել էր բազմահարկ կառույցի ապօրինի շինարարությունը և հայտարարել. «Մենք կանցկացնենք հասարակական լսումներ այն մարդկանց հետ, ովքեր այստեղ ապրում են, կլսենք նրանց, իսկ դուք կպատմեք, թե ինչ եք ուզում կառուցել, ինչ փաստաթղթեր ունեք: Եթե ստանաք փորձաքննության դրական եզրակացություն, ապա կշարունակեք շինարարությունը»:
Ըստ բնակիչների` 2002 թ. Երևանի քաղաքապետի որոշումը, որով հանրային տարածքը վաճառքի է հանվել և փոխանցվել Զադոյանին, օրինական հիմք չի ունեցել: Այդ պատճառով էլ քաղաքապետարանի այդ որոշումը հետ կանչելու դիմումով բնակիչներն ու ակտիվիստները մտադիր են դիմել Երևանի նոր քաղաքապետ Կարեն Կարապետյանին, ինչպես նաև` ՀՀ կառավարությանը:
