Համաշխարհային հայտնի շանսոնյե Շառլ Ազնավուրը համաշխարհային հյուրախաղերի շրջանակներում երկուշաբթի համերգ կտա Մոսկվայում՝ Կրեմլյան պալատի բեմում:
РИА Новости գործակալությանը տված հարցազրույցում Ազնավուրը նշել է, որ, չնայած շրջագայում է Եվրոպայում նոր երգացանկով, սակայն Մոսկվայում կհնչեն նաև տարբեր տարիների իր լավագույն հիթերը, քանի որ ինքը հասկանում է՝ ինչ է իրենից ուզում ռուս հանդիսատեսը:
Վերջին անգամ Ազնավուրը Մոսկվայում ելույթ է ունեցել 2007 թ.՝ հրաժեշտի հյուրախաղերի շրջանակներում, սակայն, ինչպես տեսնում ենք, 87-ամյա երգիչն այժմ ամուր կանգնած է:
«Եթե մարդ վատ է ապրում, նա իրեն վատ կզգա: Կյանքում հարկավոր է էթիկա և որոշակի դիրքորոշում, որոնք կպաշտպանեն մարդուն կործանումից և թույլ կտան հասնել մինչև կյանքի վերջը՝ ամուր կանգնած: Դրա համար անհրաժեշտ է կարգուկանոն, և դա այնքան էլ տհաճ չէ, չնայած ոմանք հակառակ կարծիքին են»,- ասել է Ազնավուրը:
Երգիչը նաև հիշել է 1963 թ. Ռուսաստան կատարած այցի ժամանակ իր տպավորությունների մասին:
«Կյանքի մասին տպավորություններն այնքան էլ հաճելի չէին: Մենք մի քիչ կոմունիստ էինք, և ինձ բացատրեցին, որ ես դրախտ եմ գնում, քանի որ այդ ժամանակ այդպես էին կարծում: Եվ ես շատ արագ հասկացա, որ դրախտը իրականում դժոխք է: Վերադառնալով՝ ես ոչինչ չասացի, քանի որ իրավունք չունեի քննադատել այն երկիրը, որտեղ եղել էի: Բայց կտրուկ փոխեցի հայացքներս քաղաքականության նկատմամբ. դրանից հետո այն ինձ չի հետաքրքրում»,- կիսվել է Ազնավուրը:
Այնուամենայնիվ նա խոստովանել է, որ մարդկանց և երկիրը շատ է հավանել, քանի որ ռուս հանդիսատեսը շուտ է ընկալում իր երգերը:
Հարցազրույցի ավարտին Ազնավուրը նշել է, որ ժամանակակից հանդիսատեսը երկար տարիների ընթացքում չի փոխվել:
«Ոչ թե հանդիսատեսն է փոխվել, այլ փոխվել է այն, թե ինչպես է մեդիան մեզ մատուցում նյութը: Հաճախ մեզ մատուցում են մի բան, որը ոչ հետաքրքրություն ունի, ոչ նշանակություն: Այսօր մենք հեռացել ենք երկրների մշակույթից և շատ ենք կողմնորոշվել դեպի ԱՄՆ»,- ասել է նա:
