Ռուսական Regnum լրատվական գործակալության փոխանցմամբ՝ դեկտեմբերի 14-16-ը Գյումրիում տեղի է ունենալու «Գյումրի-Կարս» երկրորդ տնտեսական ֆորումը, որին մասնակցելու են հայկական և թուրքական ընկերությունների ներկայացուցիչները։
Միջոցառումը կազմակերպվել է ԱՄՆ-ի միջազգային զարգացման գործակալության (USAID) ֆինանսական աջակցությամբ՝ «Հայ-թուրքական հարաբերությունների բարելավմանն աջակցելուն» ուղղված ծրագրի շրջանակներում։
Կարսից 50 կիլոմետր հեռավորության վրա ընկած Գյումրիում կայանալիք այդ ֆորումում երկու քաղաքների ձեռնարկատերերը ձգտելու են բարելավել միմյանց միջև ուղիղ բիզնես կապերը։ Այս անգամ ֆորումին մասնակցելու են ավելի քան 30 հայկական ու թուրքական ընկերությունների ներկայացուցիչներ, ինչպես նաև զբոսաշրջային ոլորտի և ռեստորանային բիզնեսի մասնագետներ։
Հիշեցնենք, որ հայ-թուրքական առաջին բիզնես ֆորումը տեղի է ունեցել նոյեմբերին Երևանում։ Այդ կապակցությամբ պաշտոնական Անկարան հայտարարել է, որ չի աջակցում նախաձեռնությանը։ Հայաստանի և Թուրքիայի միջև տարեկան ապրանքաշրջանառությունը կազմում է 300 միլիոն դոլար։