Ծննդյան տոներից առաջ կայացավ Իտալիայի առաջնության 17-րդ տուրը: Արդեն տեղեկացրել էինք, որ շաբաթ օրը մրցաշարային աղյուսակի առաջատար «Միլան»-ը տուրի կենտրոնական խաղում 0:1 հաշվով պարտվեց «Ռոմա»-ին, «Չեզոնա»-«Կալյարի» հանդիպումն էլ ավարտվեց տանտերերի հաղթանակով` 1:0: Կիրակնօրյա հանդիպումներից մեծ հետաքրքրություն էին առաջացնում առաջատար քառյակում գտնվող «Նապոլի»-ի, «Լացիո»-ի և «Յուվենտուս»-ի մասնակցությամբ խաղերը: «Նապոլի»-ն հաղթեց «Լեչե»-ին և մրցաշարային աղյուսակում բարձրացավ երկրորդ հորիզոնական: Մրցավարի կողմից ավելացրած ժամանակում հանդիպման միակ գոլը խփեց Էդիսոն Կավանին: «Լացիո»-ն 3:2 հաշվով պարտության մատնեց «Ուդինեզ»-ին և այժմ երրորդ տեղում է: Հռոմեացիներին 88-րդ րոպեին հաղթանակ բերեց «Ուդինեզ»-ի ֆուտբոլիստի ինքնագոլը: «Յուվենտուս»-ը «Կևո»-ի հետ արտագնա խաղում 31-րդ րոպեին բացեց հաշիվը, բայց մրցավարի կողմից ավելացված վերջին րոպեին բաց թողեց պատասխան գնդակ ու հանդիպումն ավարտվեց 1:1 հաշվով: Մյուս խաղերում գրանցվեցին հետևյալ արդյունքները. «Բարի»-«Պալերմո»` 1:1: «Կատանիա»-«Բրեշիա»` 1:0: «Պարմա»-«Բոլոնիա»` 0:0: «Ֆիորենտինա»-«Ինտեր» և «Սամպդորիա»-«Ջենոա» հանդիպումները հետաձգվել են:
