Կիրակի օրը Կրասնոդարի դատապարտյալների հիվանդանոցից Երևան է տեղափոխվել քրեական աշխարհում հայտնի հեղինակություններից մեկի` Կանևսկոյ Արմենի դին։ Ըստ քրեական աշխարհին մոտ կանգնած մեր աղբյուրների՝ նախկին խորհրդային երկրների մի շարք «օրենքով գողեր» ցանկացել են ներկա գտնվել Կանևսկոյի հուղարկավորության արարողություններին, սակայն չնայած հայաստանյան բազմաթիվ քրեական օլիգարխների թախանձագին խնդրանքներին` Հայաստանի նախագահականից թույլ են տվել ներկա գտնվել միայն Մոսկվայից ազգությամբ հայ Կամո Թիֆլիսկիին։ Մյուսներին, այդ թվում՝ Ռուսաստանում ամենահայտնի օրենքով գով Դեդ Հասանին, արգելվել է ժամանել Հայաստան։ Հիշեցնենք. Արմեն Կանևսկոյը (Արմեն Հարությունյան) 2009 թվականին դատապարտվել էր 11 տարվա ազատազրկման և շաքարախտով հիվանդ լինելու պատճառով պահվում էր դատապարտյալների հիվանդանոցում:
Արմեն Հարությունյանը ծնվել է Երևանում 1970 թ: 1997 թ. նա «օրենքով գող» է կարգվել, իսկ այդ «պատվավոր» կոչումը նրան տվել է Դեդ Հասանը: Շատերը խոսում էին, որ նա կոչումի համար Դեդ Հասանին հսկայական գումարներ է տվել: Սկզբում Ա. Հարությունյանը, տեղափոխվելով Հայաստանից, գրանցվել է Կրասնոդարի մարզի Կանևսկոյ շրջանում, որտեղից էլ ստացել է իր անունը: Նա «նայել է» Կրասնոդարի գյուղատնտեսական շատ շրջաններ` հետևելով, որպեսզի այստեղի գյուղատնտեսական հայտնի կազմակերպությունները ժամանակին գումարներ փոխանցեն «գողական բյուջե»: Այնուհետև սկսել է զբաղվել նավթային բիզնեսով՝ չմոռանալով քրեական բիզնեսի մյուս ոլորտները` դրամաշորթում, մարդկանց առևանգում, զենքի առևտուր, ֆինանսական տարբեր խարդախություններ: Նրա ազդեցությունը հետզհետե սկսել է տարածվել Ռուսաստանի ողջ հարավում: Նա մի քանի անգամ դատված է եղել:
