ՄԻՊ գրասենյակ ուղղված ամենաշատ բողոքները վերաբերել են անձանց ընտանեկան նպաստի իրավունքից զրկելուն և կենսաթոշակները սխալ հաշվարկելուն: Այսօր Մարդու իրավունքների EXPO 2011-ի շրջանակում բացման խոսքի ժամանակ տեղեկացրեց ՄԻՊ Կարեն Անդրեասյանը`ամփոփելով մարդու իրավունքների ոլորտում տարվա ընթացքում իր ստացած տպավորությունները, ձեռքբերումները և հիասթափությունները:
Նա ներկայացրեց այս տարվա ամենամնեծ հիասթափությունը: «Շատերին է հայտնի երեք դատավորների հետ կապված իմ հրապարակային նախաձեռնությունը, որը մերժվեց: Դա իմ ամենամեծ հիասթափությունն էր Հայաստանի անկախությունից ի վեր»,- նշեց Կ. Անդրեասյանը:
Ամենասուր խնդիրն, ըստ Կ. Անդրեասյանի, արդար դատաքննության պակասն է: Ակնհայտ է, որ մարդու իրավունքների պաշտպանությունը որևէ երկրում առաջին հերթին դատական իշխանության խնդիրն է: Նա դիմեց քաղաքական ուժերին և հասարակությանը՝ խնդրելով, որ առաջիկա ընտրությունների շրջանում ծավալվող հանրային քննարկումներում ոչ միայն ներկայացվեն դատական իշխանության խնդիրները, այլև ընտրողներին ներկայացնեն արդար դատարան ունենալու գործուն և իրատեսական ծրագրեր:
Ամփոփելով տարին`նա ասաց, որ դրական լուծումներ է նկատել Պաշտպանության նախարարությունից: «ՄԻՊ-ի առաջարկներն ընդունել են Առողջապահության և Սոցապ նախարարությունները: Ամենաանհարիր պատասխանը ստացել ենք Կրթության և գիտության նախարարությունից»,- մեկնաբանեց ՄԻՊ Կարեն Անդրեասյանը:
Նա նաև ասաց, որ չի խոսի մուրացիկ երեխաների, ծայրահեղ աղքատության մեջ հայտնված մարդկանց, ծեծված կանանց, անմարդկային վերաբերմունքի ենթարկվող կալանավորի կամ զինծառայողի, խտրական վերաբերմունքի արժանացած փոքրամասնության ներկայացուցչի, անտուն ու անապահով փախստականի մասին: «Այս ամենի մասին առավել գունեղ և տպավորիչ կպատմեն այն տաղավարները, որոնք կբացվեն մի քանի րոպեներից»,- նկատեց Կարեն Անդրեասյանը:
Մարդու իրավունքների EXPO 2011-ին ներկա էին քաղաքական գործիչներ, հասարակական կազմակերպությունների ներկայացուցիչներ: Որոշ հասարակական կազմակերպություններ հյուրերին ներկայացնում էին իրենց թեմատիկ տաղավարները:
