Ինչպես հաղորդում է БЕЛТА լրատվական գործակալությունը, Բելառուսի նախագահական ընտրությունների ժամանակ, որոնք կայացել են դեկտեմբերի 19-ին, հաղթել է Ալեքսանդր Լուկաշենկոն, որը հավաքել է ընտրողների ընդհանուր ձայների 79,67%-ը: Մյուս թեկնածուները չեն հաղթահարել 3 տոկոսը: Բոլորին դեմ է քվերակել 6,47%-ը, իսկ մասնակցությունը կազմել է 90,66%:
Ընտրություններից անմիջապես հետո ընդդիմությունը փողոց հանեց մի քանի հազար մարդու: Նրանց հաջողվեց ժամանակավորապես փակել Մինսկի կենտրոնական փողոցները: Մարդկանց մի մասն ուղղվեց դեպի Կենտրոնական ընտրական հանձնաժողով, իսկ մյուս մասը` դեպի կառավարության շենք: Ընդդիմության ներկայացուցիչների և իրավապահների միջև այդ երկու շենքերի մոտ տեղի են ունեցել բախումներ, կոտրվել են մուտքի դռներն ու պատուհանները: Սակայն ոստիկանությունը կարճ ժամանակում ճնշել է բողոքի ակցիաները:
Մինչ բողոքի ակցիաները կսկսեին, իրենց գրասենյակների մոտ դաժան ծեծի ենթարկվեցին նախագահի թեկնածուներ Վլադիմիր Նեկլյաևը և Ալեքսանդր Սաննիկովը: Նեկլյաևը տեղափոխվել է հիվանդանոց:
Ավելի ուշ բելառուսական իրավապահները ձերբակալեցին հիվանդանոցում գտնվող Նեկլյաևին, ինչպես նաև 4 այլ ընդդիմադիր թեկնածուներին: Ձերբակալվել են նաև ընդդիմության մի քանի հարյուր ներկայացուցիչներ: Իրավապահների մի մասն արդեն հասցրել է հայտնել, որ բելառուսական ընդդիմության ներկայացուցիչների գործողությունները որակվում են որպեմ սահմանադրական կարգը տապալելու փորձ։