«Եթե ժողովուրդը Իսլամական Հանրապետություն չուզի, կարող է հեղափոխության միջոցով փոխել համակարգը»

Իրանի իսլամական հեղափոխության պահակազորի հրամանատարի տեղակալ ու նախկին մշակույթի նախարար Մուհամադ Հուսեյն Սաֆար Հարանդին բարեկարգչական «Ազգային վստահություն» կուսակցության կենտրոնական վարչության անդամ Մուհամադ Ջավադ Հաղշենասի հետ Իրանի «Շահիդ Բեհեշթի» բժշկական համալսարանում կայացած բանավեճի ընթացքում հայտարարել է. «Եթե ժողովուրդը մի օր հասավ այն եզրակացության, որ այլևս իսլամական համակարգը չի ուզում, կարող է հեղափոխության միջոցով փոխել երկրի համակարգը, բայց ինչ-որ մեկը ժողովրդի անունից որոշումներ կայացնելու իրավունք չունի»: Նա ավելացրել է. «Երբ 40 միլիոն մարդ մասնակցում է նախագահական ընտրությունների քվեարկությանը, ուրեմն ապացուցվում է, որ նրանք մեր հեղափոխությունը (իսլամական) ընդունում են»։
Մուհամադ Ջավադ Հաղշենասը իր հերթին շեշտել է. «Մենք հեղափոխությունը լավ միջոց չենք համարում, որովհետև ծախսատար է: Լավագույն միջոցը դանդաղ բարեկարգումներն են, և չպետք է ժողովրդին ըմբոստության հրահրել»։