Հատուկ քննչական ծառայությունում ավարտվել է ՀՀ ոստիկանության ՃՈ պետի կողմից յուրացում կատարելու դեպքի առթիվ հարուցված քրեական գործի նախաքննությունը:
Նախաքննության օրինականության նկատմամբ հսկողություն իրականացնող դատախազը հաստատել է մեղադրական եզրակացությունը:
Ինչպես «Առաջին լրատվական»-ին տեղեկացնում են ՀՀ գլխավոր դատախազության լրատվական ծառայությունից, մինչդատական վարույթում ձեռք բերված ապացույցների հիման վրա պարզվել է, որ ՀՀ ոստիկանության ՃՈ պետ Մարգար Օհանյանը, հանդիսանալով պաշտոնատար անձ, իր պաշտոնեական դիրքն օգտագործել է ծառայության շահերին հակառակ` էական վնաս պատճառելով պետության օրինական շահերին:
Մասնավորապես` 2009թ. հունվարից 2011թ. հուլիսն ընկած ժամանակահատվածում ոստիկանության ՃՈ տրանսպորտային միջոցների շահագործման համար ՀՀ պետական բյուջեի և ՃՈ արտաբյուջետային միջոցների հաշվին ձեռք է բերվել և ՃՈ 1-ին և 2-րդ սպայական գումարտակներին բաշխելու համար Մ. Օհանյանին է հատկացվել 2 480 720 լիտր բենզին:
Նախաքննության նյութերի համաձայն` նույն ժամանակահատվածում ՃՈ պետը հիշյալ բենզինից առանձնապես խոշոր չափերով` 197 003 060 ընդհանուր արժողությամբ 574 420 լիտր բենզինը յուրացնելու նպատակով ՃՈ տնտեսական բաժանմունքի պետ Արա Լևոնյանին, տեխնիկ Սամվել Մախմուրյանին և 2-րդ սպայական գումարտակի հրամանատար Ստեփան Կարախանյանին հանձնարարել է 1-ին և 2-րդ սպայական գումարտակների համար նախատեսված 2 480 720 լիտր բենզինից ծառայության նպատակով բաշխել ընդամենը 1 906 300 լիտրը:
Մնացած` 574 420 լիտր բենզինը կտրոնների տեսքսվ հիշյալ անձինք հանձնել են Մ. Օհանյանին, ով յուրացրել է ՃՈ պատկանող առանձնապես խոշոր չափերի հիշյալ գույքը:
Այնուհետև Ա. Լևոնյանը, Ս. Մախմուրյանը և Ս. Կարախանյանը, օժանդակելով Մ. Օհանյանին, վերջինիս հանձնարարությամբ 2009թ. մինչև 2011թ. հուլիսն ընկած ժամանակահատվածում բենզինի ելքի կարգադրություններով, բաշխման և ծախսի վերաբերյալ ամսական հաշվետվություններով ցույց են տվել և ձևակերպել` իբր սպայական 1-ին և 2-րդ գումարտակներին հատկացվել և ծախսվել է 2 480 720 լիտր բենզին:
Նախաքննությամբ ձեռք բերված ապացույցների համաձայն` մեղադրյալների գործողությունների հետևանքով պետությանը պատճառված վնասը կազմել է 217 600 000 դրամ, որից նախաքննության փուլում վերականգնվել է 198 000 000 դրամը: Մ. Օհանյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով և 179-րդ հոդվածի 3-րդ մասի 1-ին կետով, Ս. Կարախանյանին` ՀՀ քրեական օրենսգրքի 38-179-րդ հոդվածի 3-րդ մասի 1-ին կետով և 179-րդ հոդվածի 3-րդ մասի 1-ին կետով, Ա. Լևոնյանին և Ս. Մախմուրյանին` 38-179-րդ հոդվածի 3-րդ մասի 1-ին կետով:
Քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան` ըստ էության քննելու համար:
Քրեական գործից մաս է անջատվել` ՃՈ առանձին պաշտոնատար անձանց կողմից չարաշահումներ կատարելու վերաբերյալ, որով նախաքննությունը շարունակվում է:
