Իր շուրջ եղած բազմաթիվ քննարկումներից հետո «Բարգավաճ Հայաստան» կուսակցության կողմից կատարյալ լռության պահպանումը նրա մարտավարական քայլերից է: «Առաջին լրատվական»-ի հետ զրույցում նման տեսակետ հայտնեց սոցիոլոգ Ահարոն Ադիբեկյանը:
«Քանի որ ԲՀԿ-ն կոալիցիոն հուշագիր է ստորագրել, և հուշագրում էլ գրված է, որ նախագահական ընտրությունների ժամանակ նա սատարելու է Սերժ Սարգսյանին, հետևաբար կուսակցությունը գտնում է, որ մնացած հարցերում ինքն ազատ է իր գործելակերպում և մեկնաբանությունների կարիք չունի: Առաջիկա խորհրդարանական ընտրություններում ԲՀԿ-ն կարող է անել այն, ինչ ցանկանում է»,- նկատեց սոցիոլոգը:
Ահարոն Ադիբեկյանի խոսքով, ԲՀԿ-ն քաղաքական մեծ հարցեր երբևիցե չի բարձրացրել, խուսափել է քաղաքական բանավեճերից և սեփական խնդիր է դիտարկում երկրի սոցիալ-տնտեսական բարգավաճումը, տնտեսական կապերի ամրապնդումը: «Քաղաքական դաշտում գոյություն ունեն բրենդներ, և յուրաքանչյուր բրենդ հստակ զբաղեցրած դաշտ ունի: ԲՀԿ-ն սոցիալ-տնտեսական հարցեր ներկայացնող բրենդն է»,- նշեց սոցիոլոգը: