«Բարգավաճ Հայաստան» կուսակցության պատգամավոր Նաիրա Զոհրաբյանը նամակ է հղել Եվրոպական ժողովրդական կուսակցության նախագահ Վիլֆրիդ Մարթենսին՝ խնդրելով պարզաբանել՝ ինչո՞ւ իրեն անդամակցելու համար դիմած հայաստանյան երեք կուսակցությունների կողքին չի հնչել նաև ԲՀԿ անունը: «Առաջին լրատվական»-ի հետ զրույցում այս մասին հայտարարեց ինքը՝ Նաիրա Զոհրաբյանը:
«ԵԺԿ համագումարից թե առաջ, թե հետո տեխնիկապես ուղղակի անհնար էր մոտենալ Մարթենսին և նրանից որևէ մեկնաբանություն կամ պարզաբանում ստանալ՝ ինչո՞ւ հայաստանյան երեք կուսակցությունների՝ ՀՀԿ-ի, ՕԵԿ-ի և «Ժառանգության» կողքին չհնչեց նաև ԲՀԿ անունը: Այնպես որ, Երևան վերադառնալուն պես ես պաշտոնական նամակով դիմել եմ Մարթենսին՝ խնդրելով պարզաբանում ներկայացնել ԲՀԿ հանդեպ իրենց դիրքորոշման վերաբերյալ:
Ընդ որում՝ ես գրել եմ, որ մեզ համար ընդունելի կլինի ցանկացած պարզաբանում: Քանի որ անդամակցության համար դիմել էինք պաշտոնապես, հետևապես պաշտոնական արձագանք ենք ակնկալում: Երբ որ կլինի իրենց պաշտոնական արձագանքը, այն ժամանակ էլ ամեն բան հստակ կլինի, բայց քանի դեռ պաշտոնական արձագանք չկա, բացարձակապես չեմ կարող ենթադրությունների հիման վրա գնահատականներ տալ: Ամբողջ խնդիրն այն է, որ ԵԺԿ-ն չի ասել, թե մերժում է մեզ: Մենք, պարզապես, չգիտենք՝ ինչո՞ւ ԲՀԿ անունը չեն տվել: Էստ էության, նույնիսկ պարզ չէ՝ խոսքը մերժմա՞ն մասին է, թե՞ հետաձգման»,- ամփոփեց Նաիրա Զոհրաբյանը:
Հիշեցնենք, որ Եվրոպական ժողովրդական կուսակցության անդամակցության հայտ ներկայացրել էին հայաստանյան 4 քաղաքական ուժեր՝ ՀՀԿ-ն, ՕԵԿ-ը, «Ժառանգությունը» և ԲՀԿ-ն: Առաջին երեքի հարցը կքննվի 2012 թվականի փետրվարին, իսկ ԲՀԿ դեպքում ԵԺԿ-ն դեռևս լռություն է պահպանում: