«Բարգավաճ Հայաստան» կուսակցությունը պաշտոնապես չի պատասխանի ՀԱԿ առաջնորդ Լևոն Տեր-Պետրոսյանի հայտարարություններին:
ԲՀԿ-ի առաջնորդ Գագիկ Ծառուկյանի խոսնակ Խաչիկ Գալստյանն «Ազատություն» ռադիոկայանին փոխանցել է, որ իրենք ոչինչ չունեն ասելու, բացի այն, որ «այդ քաղաքագիտական վերլուծությունը ընդունված է ի գիտություն»:
ԲՀԿ-ի առաջնորդը Հայաստանից բացակայում էր, երբ Լևոն Տեր-Պետրոսյանը նոյեմբերի 25-ի հանրահավաքում հայտարարեց, որ ՀԱԿ-ը պետք է պատրաստ լինի լրջորեն քննարկել ԲՀԿ-ի հետ համագործակցելու հնարավորություններն ու հեռանկարները, եթե «Բարգավաճ Հայաստանն» անկեղծորեն մտադիր է դուրս գալ կոալիցիայից և պայքարել օրինական ընտրությունների համար:
Խ. Գալստյանը տեղեկացրել է, որ Գագիկ Ծառուկյանի` Հայաստան վերադառնալուն պես «նրան զեկուցվել է նրա բացակայության օրերին ներքաղաքական զարգացումների, տարաբնույթ առաջարկների և վերլուծությունների մասին, և այդ ամենը Ծառուկյանն ի գիտություն է ընդունել»:
Գալստյանն «Ազատություն» ռադիոկայանին նաև տեղեկացրել է, որ ԲՀԿ առաջնորդը որևէ բան չի ասել Տեր-Պետրոսյանի հայտարարությունների վերաբերյալ:
ՀԱԿ համակարգող Լևոն Զուրաբյանն էլ «Ազատություն» ռադիոկայանի հետ զրույցում նշել է, որ իրենք «Բարգավաճ Հայաստան» կուսակցությունից պաշտոնական արձագանք չեն էլ սպասել:
«Քաղաքագիտական վերլուծությունը չի ենթադրում պատասխան», – ասել է Զուրաբյանը:
Իսկ ինչ վերաբերում է Լ. Տեր-Պետրոսյանի հայտարարությունն «ի գիտություն ընդունելուն», ՀԱԿ-ի համակարգողն ասել է. «Այդ պատասխանը համարում եմ նորմալ և ադեկվատ` ստեղծված քաղաքական իրավիճակում»:
Լ. Զուրաբյանը հայտարարել է, որ «Բարգավաճ Հայաստանի» դեմ սկսված ճնշումներն ակնհայտ են, դա այսօր հերքում են միայն ոստիկանապետն ու իշխող Հանրապետական կուսակցությունը:
«Նույնիսկ ԲՀԿ-ի պատգամավորներն են ուղիղ տեքստով խոսել այդ մասին», – ասել է Զուրաբյանը` կարծիք հայտնելով, որ Սերժ Սարգսյանը հստակ նպատակ է դրել ճնշումների միջոցով հնազանդեցնել Գագիկ Ծառուկյանին և հարկադրել ՀՀԿ-ի հետ միասնական ցուցակով գնալ ընտրությունների, որպեսզի ԲՀԿ-ի ռեսուրսն ուղղվի իշխանությունների և ՀՀԿ-ի հաղթանակին, իսկ եթե դա չստացվի` ոչնչացնել ԲՀԿ-ի ռեսուրսները:
Եթե «Բարգավաճ Հայաստանը» կարողանա դիմակայել այդ ճնշումներին և իր մեջ ուժ գտնել ընդդիմություն դառնալու համար, ապա ԲՀԿ-ի հետ ՀԱԿ-ի համագործակցելու հեռանկարը, ըստ Լ. Զուրաբյանի, կարող է իրական դառնալ:
