Ստանդարտների ազգային ինստիտուտի տնօրեն Ենոք Ազարյանը մամուլի ասուլիսի ժամանակ
ներկայացրեց «Հայաստանի ազգային ստանդարտների
ներդաշնակեցման 2011-2015 թ.թ. ռազմավարական ծրագիրը», որն իր մեջ ներառում է 660 ստանդարտ:
Ենոք Ազարյանը նշեց, որ ծրագիրը վերաբերում է մեր տնտեսության մեջ գերակա բոլոր ուղղություններին`
հեռահաղորդակցություն, էներգետիկա, տեղեկատվական
տեխնոլոգիաներ, գազամատակարարում, շինարարական
ոլորտ, հակասեյսմիկ սարքավորումներ, շինանյութեր, ճանապարհատրանսպորտային ոլորտ, շրջակա
միջավայրի պաշտպանություն, բանկային գործեր եւ ֆինանսական ծառայություններ, միս-մսամթերք,
խմելու ջուր եւ այլն: Ենոք Ազարյանն ասաց, որ ծրագիրը կազմելուց առաջ այն ուղարկել են տարբեր ոլորտների փորձագետներին, որպեսզի իմանան
նրանց մասնագիտական կարծիքները: Ենոք Ազարյանի հավաստմամբ, այսօր Հայաստանի ազգային
ֆոնդում կա 18 հազար ստանդարտ. կան ստանդարտներ, որոնք գործում են անցյալ դարի
50-60-ական թվականներից եւ կորցրել են իրենց արդիականությունը: Մամուլի ասուլիսի ժամանակ
Ենոք Ազարյանը տեղեկացրեց, որ նոր ծրագրով իրենք ցանկանում են համակարգը դարձնել ճկուն:
Ստանդարտների ազգային ինստիտուտի տնօրենն ասաց, որ իրենք ունեն վերապատրաստման կենտրոն,
եւ բոլոր գործարարներին ուղարկում են վերապատրաստման: Նա տեղեկացրեց, որ այն գործարարները,
որոնք կանտեսեն ստանդարտները, նրանց համար նախատեսված են տուգանքներ: Ենոք Ազարյանը հիշեցրեց,
որ տարբեր ոլորտներում, ինչպիսիք են, օրինակ,
բանկային գործը, հեռահաղորդակցության ոլորտը, Հայաստանում դեռեւս չկան ստանդարտներ:
Ենոք Ազարյանը նշեց, որ զարգացած երկրներում, երբ գործարարը չի կատարում ստանդարտի
պահանջները եւ փորձում է զբաղվել զեղծարարությամբ, նրա գործունեությանը վերջ է դրվում: