Այսօր առավոտյան Ռուսաստանի Կրասնոդար քաղաքի դատապարտյալների հիվանդանոցում մահացել է քրեական աշխարհում ամենահայտնի «օրենքով գողերից» մեկը` Արմեն Հարությունյանը` Կանևսկոյ Արմեն մականունով: Նա 2009 թվականին դատապարտվել էր 11 տարվա ազատազրկման և շաքարախտով հիվանդության պատճառով պահվում էր դատապարտյալների հիվանդանոցում:
Արմեն Հարությունյանը ծնվել է Երևանում 1970թ.: 1997թ. նա կարգվել է «օրենքով գող», իսկ այդ «պատվավոր» կոչումը նրան տվել է Դեդ Հասանը: Շատերը խոսում էին, որ նա իր կոչումի համար Դեդ Հասանին է տվել հսկայական գումարներ: Սկզբում նա, տեղափոխվելով Հայաստանից, գրանցվել է Կրասնոդարի մարզի Կանևսկոյ շրջանում, որտեղից էլ ստացել է իր անունը: Նա «նայել է» Կրասնոդարի գյուղատնտեսական շատ շրջաններ` հետևելով, որպեսզի այստեղի գյուղատնտեսական հայտնի կազմակերպությունները ժամանակին գումարներ փոխանցեն «գողական բյուջե»: Այնուհետև նա սկսել է զբաղվել նավթային բիզնեսով, չմոռանալով քրեական բիզնեսի մյուս ոլորտները` դրամաշորթում, մարդկանց առևանգում, զենքի առևտուր, ֆինանսական տարբեր խարդախություններ: Նրա ազդեցությունը հետզհետե սկսել է տարածվել Ռուսաստանի ողջ հարավում: Նա մի քանի անգամ դատված է եղել:
