Հայ ազգային կոնգրեսի` նոյեմբերի 25-ից շրջանառության մեջ մտած Կոնգրես-ԲՀԿ «քաղաքագիտական» թեման արդեն մոտ երկու շաբաթ է` գտնվում է հասարակական-քաղաքական շրջանակների ուշադրության կենտրոնում: Իսկ ինչքա՞ն կշարունակվի այդ ուշադրությունը: Արդյոք թեման բավարար կլինի՞ Կոնգրեսի ձմեռային դադարն անցկացնելուն: Բանն այն է, որ եթե այդ թեման չլիներ, ապա նոյեմբերի 25-ի հանրահավաքից արդեն իսկ երկու շաբաթ անց Հայ ազգային կոնգրեսը, որպես քաղաքական հիմնական ուժերից մեկը, մոռացության կմատնվեր:
Ձմեռային երկարատև դադարից առաջ Լևոն Տեր-Պետրոսյանը գուցե նաև հենց դա էր հաշվարկել` թեման դնելով շրջանառության մեջ: Այսինքն` գուցե գործ ունենք ոչ այնքան հեռահար քաղաքական հաշվարկի, որքան մարտավարական պարզ մտահղացման հետ, կամ հաշվարկին զուգահեռ` գործ ունենք նաև այդպիսի մտահղացման հետ: Բայց արդյոք սկսված քննարկումները կձգվե՞ն երեք-չորս ամիս` անընդհատ շրջանառության մեջ պահելով Կոնգրեսի անունը: Այստեղ գուցե էական դեր խաղա Գագիկ Ծառուկյանը` իր լռությամբ:
Տարբերակները շատ են. Ծառուկյանը թե՛ իր լռությամբ, թե՛ այն խախտելով` կարող է նպաստել թեմայի կամ շարունակությանը, կամ էլ բավական արագ փակվելուն: Օրինակ` ԲՀԿ առաջնորդը կարող է պարզապես վեր կենալ և հայտարարել, որ Կոնգրեսի հետ համագործակցություն չի պատկերացնում, կամ եթե Կոնգրեսը շատ է ուզում, ապա կարող է գալ ու միանալ ԲՀԿ-ին: Թեման այդպիսով, ըստ էության, կփակվի: Բայց Ծառուկյանը կարող է թեման փակել լռությունը մի փոքր ձգելով ևս, որովհետև եթե ԲՀԿ կողմից համարժեք զարգացումներ չլինեն՝ բացահայտ կամ ինչ-որ ակնարկի տեսքով, ապա թեման ինքնաբերաբար կսպառվի, որովհետև Կոնգրեսն ու ԲՀԿ-ն ամենևին էլ հավերժական շարժիչներ չեն, առավել ևս, որ Սերժ Սարգսյանը կարող է մի հերթական աղմկոտ փոփոխությամբ ուշադրությունը շեղել իր կողմն ու այդպիսով կրկին մոռացության մատնել Կոնգրես-ԲՀԿ թեման:
Սակայն այստեղ, բնականաբար, քայլերի դիապազոն կա նաև Կոնգրեսի մոտ: Թերևս կասկած չկա, որ Լևոն Տեր-Պետրոսյանը կարող էր մի քիչ «յուղ» պահած լինել, ամբողջ «յուղը» սպառած չլինել նոյեմբերի 25-ին, որպեսզի հետո այդ պահած «յուղն» ավելացներ նոյեմբերի 25-ին վառած կրակի վրա, երբ այն սկսեր ինչ-ինչ պատճառներով մարել ժամկետից շուտ:
Այնպես որ` չի բացառվում, որ Կոնգրես-ԲՀԿ թեման ներքաղաքական այլ շերտեր չբացելու և դեպի սպառում գնալու դեպքում ձմռանը Տեր-Պետրոսյանը ինչ-որ առիթով մի քիչ էլ յուղ ավելացնի այդ կրակին` ձմեռը տաքանալու և անցկացնելու համար` Կոնգրեսի անունը վառ պահելով ներքաղաքական ձմեռային զարգացումներում: